翠翠：對白連我都唔明

葉翠翠參演的劇集《金枝慾孽貳》收視差強人意，她昨出席活動時直言故事內容較深、對白太多文言文，收到劇本後亦有少少崩潰：「啲對白我都唔明，要問人，觀眾可能都要花啲時間。我第一次做奸角，拍攝初期都拿捏唔到，拿捏到時就拍完啦。拍嗰時壓力好大，食唔到又瞓唔到，瘦咗十磅，睇咗三次中醫。我嘅演出係一般，但盡咗力。」客串了一集的陳煒則稱：「唔可以一星期就定成績，希望大家畀啲耐性去睇，套劇唔係咁淺白，希望唔好太計較個收視。我演出嗰集都有粉絲留言讚我做得好，啲造手做得好好，我投入好多心機去學，有人支持好開心。龔嘉欣演來眼神好肯定，新一代演員中好難得。」