李嘉欣甘為孺子牛

「大美人」李嘉欣（Michele）不但擁有一張美麗的臉蛋，更贏得「香港小姐」冠軍的名銜，於娛樂圈非常吃得開。及後，她與富商許晉亨（亨亨）相戀及結婚，於2011年更誕下愛兒JaydenMax（小JM），擁有美滿的婚姻及家庭。已淡出娛樂圈的她，生活當然以寶貝仔為中心，但她仍堅持工作，做到家庭、事業兩得意。

主角被搶

小JM的來臨，為Michele及亨亨的生命帶來極大轉變。亨亨貴為中建企業集團主席許世勳兒子，自小集萬千寵愛在一身，如今有了小JM，大家都把注意力及關愛都轉移到兒子身上。問到亨亨可有呷醋？Michele笑言：「佢做慣主角，依家畀人搶晒風頭，梗係不是味兒啦！我都不是味兒o架！小JM依家做咗我大老闆，呢份工又冇人工，最多間唔中錫你一下。」但天下間哪有父母不愛錫自己的子女？即使犧牲再多的時間及心力，他們仍會毫無保留地付出。「當你有咗小朋友之後，就會知道愛一個人係要付出，你唔會計較你得到幾多。」

Michele十分欣賞愛彼錶的款式和工藝。	Michele是港姐冠軍，從此踏上燦爛星途。	Michele於08年與亨亨結婚，堪稱郎才女貌。

身教重要

Michele坦言教育小JM的同時，自己亦從中學到了不少東西。「身教好重要，其實作為父母，最重要係以身作則。我試過唔小心大聲講嘢，小JM就用一個好奇怪嘅眼神望住我，問『What happened?』，即時警惕咗我唔可以咁大聲講嘢，因為小朋友好多嘢都係跟住你做。我最希望佢可以做到要EQ高同有責任感，所以我會叫佢做嘢慢啲、做人要有禮貌。如果見到佢對住陌生人都好有禮貌，真係好有滿足感。」

即使湊小JM辛苦又沒有人工，但Michele仍然樂在其中。	小JM為Michele及亨亨的生命帶來極大轉變。	Michele經常與亨亨到有口碑的食肆光顧，那怕是街邊檔。

Michele笑言亨亨是一個很有時間觀念的人，平日手錶不離手，故很愛收藏手錶。她笑言：「除咗送手錶畀佢好似未送過其他嘢，所以都逼住我研究男裝錶，送錶畀佢係我專利，佢以後二十年都係收錶做禮物啦！哈哈！佢係一個好緊張時間嘅人，真係一秒都唔能夠差。」未知小JM是否看到爸爸經常看手錶，故年紀小小的他竟然亦很喜歡看時計！除此之外，小JM亦受父母影響，而愛上觀看賽馬比賽，擔任今屆愛彼女皇盃大使的Michele，更打算於今日（28日）舉家到馬場欣賞是次盃賽，作為家庭樂的活動之一。

睇書教仔

為了好好培育小JM，Michele近年開始研究兒童心理學，更看了不少相關書籍，她會把從書中學到的東西，套用到小JM身上。「有本書提到依家啲家長好鍾意同小朋友講好多嘢，畀好多input佢哋。但其實我哋應該每日最少畀5分鐘小朋友話事，喺嗰5分鐘裏面，做啲小朋友想做嘅事。佢每晚都會同我講『Mama, special time』，之後我哋就會一齊玩泥膠，全程由佢做主導，玩大概20分鐘。每次完嘅時候佢都會好傷心咁講『special time is over...』。」透過這短短的互動時間，不但能增進親子感情，亦能訓練小JM變得更獨立、更有自主能力。

脆弱時刻

Michele從來都給人剛強的感愛，無論事業、家庭都處理得井井有條、妥妥當當。但每當她提起小JM，面上都總會掛上溫柔的慈母笑容，稱她為「廿四孝」母親亦絕不會誇張。她自爆覺得自己最脆弱的時刻，就是帶小JM到診所打針的時候。她說：「上一次佢唔舒服，見到佢好辛苦，但係我又幫唔到佢。我真係覺得好心急同好無助，所以忍唔住喊咗出嚟。」她表示自己人生最大的願望，就是小JM健康快樂地成長，以及身邊的家人及朋友都開開心心。

識飲識食

相信有看Michele微博的童孩，都知道她是一個識飲識食的人，更不時把心水餐廳公諸同好。上至星級米芝蓮食府，下至橫街窄巷的街邊檔，她都嘗遍，只要食物美味，她都會慕名而至。但特別鍾情於日式食品的她，竟對出名精緻的懷石料理非常抗拒：「我成日覺得雖然每碟細細碟，好精緻，不過我唔覺得特別好味，而且又唔飽，食完之後我要再去食半打甜品補充。」Michele透露希望重溫下廚的樂趣，故打算把從前學做甜品的notes找出來，動手製作美味的自家甜品以饗家人！

採訪：Wendy Ng、龔凱欣