文詠珊：最緊要相愛

郭富城和熊黛林拍拖七年，終敵不過七年之癢而分手收場，令人無限唏噓。一班城中靚女，均認為情侶之間要保持新鮮感，是破解七年之癢的最好方法。莫文蔚認為拍拖要日日保持在熱戀階段、李彩華更建議少見面為妙，以保持自己的吸引力，而文詠珊則認為最緊要兩個人相愛。

文詠珊：「唔係幾多年嘅問題，而係兩個人如何相處，有啲人可以一齊一生一世，最重要係兩個人相愛。」

名模Mandy Lieu：「盡量兩個有共同興趣，唔好話拍拖，就算結咗婚，唔啱嘅話，都要分開，無得夾硬嚟。」

李彩華：「少啲見，唔好見咁多，保持神秘感，要keep住自己有吸引形象，對男仔先有新鮮感。」

歌手盧巧音：「拍拖係要互相遷就同了解，好難搵個合適嘅另一半，難得搵到嘅，有啲乜嘢問題咪大家商量。」

莫文蔚：「兩個人拍拖得耐都要保持甜蜜感覺，成日好似熱戀咁，唔好耐咗就當所有嘢係理所當然咁，凡事要顧及對方感受。」

周秀娜：「我覺得唔關七年之癢嘅問題，兩個人係鍾意對方，係冇時間問題，好似你揀啱對鞋，着得舒服，你會繼續着落去，而唔會突然去換對新鞋，兩個人相處係一門高深學問，係講求了解同包容！」

徐子珊：「我唔信七年之癢，我覺得係時間上嘅關口問題，好多時一個女仔二十幾歲拍拖，拍到差唔多六年幾左右，近三十歲前就想結婚，但三十幾歲係男人最旺盛時期，佢哋未必會想咁早結婚，當兩個人對將來憧憬唔一樣時，惟有分手！」

模特兒傅嘉莉：「七年都算長，如果七年先發覺有問題，就係好大問題，所以拍拖頭兩年根基要打得好，維持新鮮感，到十年都唔會淡。」