梁烈唯難忘三哥憤怒一睥
梁烈唯與苗僑偉生於不同年代，卻因合作電視劇而走在一起。最初由苗僑偉（三哥）眼中的「死o靚仔」，演變到現在成為好友無所不談。三嫂戚美珍更大讚唯唯力求上進，是現今年輕人中罕有品種。
梁：梁烈唯
苗：苗僑偉
戚：戚美珍
相差廿年思想接近
苗：最初見佢係大約06年拍《賭場風雲》時，點解呢條奀挑鬼、瘦猛猛，做歐陽震華後生版o架？
梁：我受過三哥「一睥」o架。當時喺菲律賓外景，我有晚想同黃宗澤夜晚出去行吓，點知三哥話市面危險有人揸槍，最終我無聽佢講出咗去。佢個憤怒一睥我仲好記得。之後拍《人間蒸發》我仲要用架車截停佢架車，場戲好危險。
苗：吓？乜嗰個係你嚟o架？個鏡頭好危險o架喎。
梁：到拍《刑警》同佢混熟咗。《抉宅男女》我仲同三嫂熟埋。
戚：其實七、八年前已認得呢個人，因為以前我成日陪阿苗踢波，初時同佢都係打招呼傾兩句。真正留意佢係一次去唱歌，現場玩到夜個個都攰晒無晒能量。佢仲拎住支咪係咁唱，無人聽照唱，我就留意到呢個後生仔。我以為佢係新人，原來佢做咗呢行好耐。
嫌演技浮誇
苗：其實我同你相差廿年，點解會咁熟？
梁：你年齡係大過我，但心智方面你細過我嘛。
苗：係喎，我哋主要話題會講車、踢波、唱歌。大家好似嘅係做嘢同玩都會認真和投入。《刑警》入面佢花好多心機，呢個o靚仔係要袋住舊廁紙喺褲袋，我初頭覺得佢好浮誇，原來佢肯花心思自己設計咗個角色性格，係好有心嘅演員，唔係行吓企吓等收工，就係咁我開始留意佢。
梁：早排發生一件事令我好感動o架，身邊好多朋友好主動去幫，三哥、叻哥都會主動。街上唔識嘅街坊都走埋嚟話支持我。有啲人唔敢騷擾我就打畀我女朋友，話有成百個人打畀佢話支持，我感動到想喊，知道咩係人間有情。有個前輩同我講過，要用真心對人，唔好理人點睇你。
苗：聽講你同女友Tina拍拖十年，時間都唔短喎。我同我太太都經歷過八年抗戰，再結婚廿三年，至今一齊三十一年嘞。我同三嫂拍拖講過無數次分手。到我哋真係想要小朋友就結婚。每個人總一定有缺點，如果有問題發生，最重要係包容和忍讓。人與人之間相處在乎大家量度。
戚：我同阿苗初初拍拖，大家後生年少氣盛實有拗撬，我係女性更加唔會讓佢，但嘈過交後發覺好無意思，咁不如唔好嘈，因為一嗌交講嘅說話同樣貌一定令人好唔舒服。後尾係佢包容我，一嗌交佢其實可以回我一句、講得更激，但佢無。日子耐啲，我試吓用另一種方法處理，有時我好嬲佢，我會諗自己啲衰嘢，會發現自己做得比人差，佢都唔係好差啫。
自嘲情緒化
梁：三哥缺點係咩？
戚：佢太好精力，無時停o架。去到依家我覺得任何人嘅缺點都係佢嘅優點。例如佢鍾意四圍走，我係佢老婆當然覺得係佢嘅缺點。但喺佢身上就變成優點，因為如果佢成日無嘢做喺屋企，無所事事喺屋企hea，男人角度咪一個缺點囉。原來佢四圍走對佢嚟講係優點，如果佢不停打波、四圍去，keep住副engine running，對佢嚟講係好事，咁咪好囉。無論佢點好動，佢咪又係要返屋企瞓覺。
苗：唯唯，咁你又點同女友相處到十年呢？
梁：佢忍得囉，我好難忍o架。我較為情緒化。如果揀一個人我喺佢身上發得最多脾氣，一定係我女朋友，有時會工作上、心情唔好，咁佢真係唔好彩嘞。而有時發夢我會郁手郁腳，佢第二朝塊臉就紅咗。同埋，我女朋友好乾淨，有時我踢完波佢會叫我將啲衫浸咗佢，但我又會唔理，不過我依家都有改變去配合，大家都包容對方。
苗：嘩，咁Tina真係好唔話得，好家庭主婦，你哋真係可以結婚嘞。
梁：我有諗o架。但結婚係一個好大工程，依家同結婚都無分別，唔會因為多咗張證書而恩愛啲。如果真係結婚，我想佢係打住風流工，等佢唔使咁辛苦。
苗：咁你享受二人世界再維持廿年都得，但如果好似我咁想要小朋友，你就要結婚畀個家佢，要對佢公平啲。
梁：女友想要小朋友o架，但我又未準備，事業剛開始，生活依家先叫穩定少少，想去吓旅行，睇吓個世界點，之後先再生，咁先可以多啲嘢話畀下一代知。三哥就上晒岸，仔囡都大晒。
苗：我仔細老婆嫩，三嫂仲好細o架咋，仲要我養o架！
文：影視組
三嫂填補「失憶」空缺
梁烈唯與三哥雖然年紀不同，但默契十足。梁烈唯比記者相約時間早了半小時到達，目的是為了不想三哥和三嫂等他。結果，三哥亦同樣早到，目的又是不想為他而久等，相當能夠為他人着想。訪問期間二人憶述往事，過程相當陶醉，他們逐一將過往合作過的劇集、年份、細節，一一靠記憶細數出來，當中充滿了笑聲、慨嘆聲和歡呼聲，而三嫂在他們之間是一個中間人，負責提點和填補他們「失憶」的空缺。