祖兒讚陳奕迅 器官搶手

容祖兒、陳奕迅昨日出席器官捐贈宣傳活動，劉小慧帶同兩女兒撐場，祖兒與Eason即場簽下器官捐贈卡，祖兒大讚Eason說：「佢個肺好值得捐，因為佢戒咗煙，好話唔好聽，佢去咗，啲嘢好搶手。」Eason則說：「我個人好極端，捐就捐晒，但要keep住健康先得，等下一個人可以用到我啲嘢。」

盼延續生命

祖兒坦言不怕母親反對她死後捐器官，因自己已長大，覺得能將生命延續意義重大。問祖兒哪個器官最OK？她謂：「肺OK o架，我又唔食煙。腦都乾淨，因為冇乜用過，但暫時腦係未可以移植。」問祖兒可會叫男友劉浩龍支持器官捐贈？她謂：「會，叫晒身邊所有人。」

祖兒和陳奕迅即席簽下器官捐贈卡。

劉小慧帶兩位女兒現身，教她們認識器官捐贈。

Eason在福布斯中國名人榜列第六位，收入榜排名更比成龍高一位，對此Eason抵死說：「咁驚！冇理由我賺錢多過成龍大哥，未必真。（以後言行會注意啲？）無論排名係千幾定二千幾，我都係做好自己。之前同張學友合唱《同舟之情》係想提升香港士氣，發覺啲新聞、情緒好負面，自己都少接觸啲新聞，尤其網上討論區愈嚟愈負面暴力，睇少啲有幫助。」

Eason情緒起伏

有傳Eason為內地節目《中國最強音》做評審有過千萬港幣酬勞，但節目首集播出後被批評，Eason謂：「大家畀啲時間接受新事物，（大家將同類型節目比較？）冇睇過之前嗰兩個。」Eason自嘲似成龍，說話經常被誤會，並笑言：「以後唔做訪問，咁咪唔使煩。」之後，Eason說要準備七月個唱，之前曾考慮接不接《中》，但卻不想只專注個唱而太壓迫自己，最終都接了。Eason前日錄完第六集已與參賽者有感情，卻有些要出局，令他情緒好大起伏。

文：音樂組