糖兄妹曲風轉熟尋快樂
組合糖兄妹出道多年，自爆無心記住組隊紀念日，反而依賴好心粉絲提醒！而最近工作密麻麻的他們更透露壓力爆煲，一個錄唔到音，一個更失聲兩星期，令「糖兄妹」慘變「苦兄妹」，幸好二人識得苦中作樂，以新歌尋找快樂。
出道多年的糖兄妹，談到組隊紀念日，糖妹（黃山怡）竟然笑笑口反問糖兄：「係幾時嘅事呢？好耐喇！我哋正式運作係二○○八年，不過幾多號就唔記得咗！」糖兄（潘雲峰）亦說：「我哋前排先講過呢件事，你當我哋四月左右啦。」得知偶像日理萬機，二人的fans便自動波提醒他們，糖兄妹因此主動向粉絲耍冧：「其實每年都有粉絲send message提醒我哋要慶祝，真係多謝佢哋！」
遲足一個月
而一向與正能量畫上等號的糖兄妹亦自爆因為最近工作多籮籮，而搞到壓力爆煲，結果錄新歌的過程足足延遲一個月！糖妹透露：「因為拍劇生活日夜顛倒，休息唔到，到我去錄新歌嗰陣，把聲完全不在狀態，然後我就諗：『落去食完嘢先再錄』！」而糖兄亦同樣苦呻：「到糖妹準備好錄新歌嗰陣，點知就輪到我失聲！仲要持續咗兩個禮拜！可能因為感冒搞到咁，嗰排真係好忟，最後遲咗成個月先錄完！」
宣傳正能量
共度了一段忟爆的日子，糖兄妹希望繼續以音樂宣傳正能量，糖兄表示：「新歌主要想同大家講點樣可以理性地得到快樂，曲風比較成熟，唔再係初出茅蘆嘅少女feel！」糖妹續說：「依家都做緊另一個音樂計劃，同緊台灣歌手范曉萱、蔡健雅、日本歌手赤秋音、崔恕老師合作出歌，有唔同嘅嘗試，好開心！」
採訪：專案組
攝影：劉智源
場地：Manzo@ Times Square