車車踩冰騰雞怕毀容
藝人張紫櫻（車車）早前為宣傳冰上曲棍球，親自落場「踩冰」拍攝宣傳片，她說：「以前讀書我都溜過吓冰，但我好驚仆，唔敢放膽玩，技術渣到你唔信，冰曲更加未玩過！今次要踩冰拍嘢，要教練扶住我先行到，但我見周圍啲小朋友溜冰溜到識飛咁，工作人員仲問使唔使畀個輔助架我轆住行，我覺得好瘀！
拍之前工作人員話冰場好凍，但我全程熱到死，因為我好緊張，好驚仆低鎅損塊面，佢哋見我咁驚，就擺咗張櫈喺冰場中間畀我坐，等我埋位先企起身。（的起心肝學溜冰，下次唔使瘀？）如果有機會拍嘢用到都會學，學埋冰曲都得，因為冰曲衫真係好似木村拓哉嘅《冰之驕子》咁，好型！但我運動細胞麻麻，除咗偶爾打吓羽毛球，平時做運動算少，連單車都唔識踩，不如學咗踩單車先！」
