見娜姐纖瘦嘆陰功 徐子珊大隻牛女輸一線
徐子珊與周秀娜在活動上鬥騷美腿，難分高下，但娜姐事業線一出，成功搶鏡，子珊毫不介意，並笑言性感是對方專利，還自爆近日為開拍新劇而緊張到瞓唔着呢！
一身型格牛女造型的徐子珊，與周秀娜（Chrissie）昨日在九龍塘的Hunter Pop Up Store上大騷美腿，養眼非常，但Chrissie輕露事業線，搶去不少風頭，難得子珊毫不介意，笑說：「向來佢都性感過我，我唔係性感嗰類！」她又表示對方纖瘦很多，我見猶憐，是隻陰功豬：「佢以前好勻稱，但唔代表佢依家唔靚，都好靚！（佢冇男友嘛？）我都冇男友，但我好大隻！」她笑言將有新劇開拍，自然會愈來愈瘦：「到時我就惹人憐愛，做隻陰功豬！」
拍子華大壓力
她透露早前為新劇試造型以致失眠：「同子華合作，我好少拍喜劇，唔知點做，所以好緊張，瞓唔着。其實之前我放假去英國旅行，都有睇當地喜劇，前排我都有睇《男親女愛》同《絕代商驕》，諗住偷吓師又做定功課，真係好大壓力！（子華話想同你拍咀戲喎？）咁尷尬！佢有講過咩？我哋係專業演員都OK！」她稱在英國旅行沒有艷遇：「喺英國期間發生波士頓馬拉松炸彈襲擊，我一個人身處外地，見陌生人行近我都驚，總之我見人就行開，怕危險，萬一返唔到嚟點算？我仲要照顧爹哋媽咪。」
狂迷索紮腳布
另邊廂的Chrissie由於「峰」芒太露，有男士用相機高「炒」，不過她一於懶理：「我唔驚，亦唔會尷尬，我只係為做嘢！（唔怕將啲相放上網？）唔擔心，我控制唔到，不過我近排拍打戲都打得o架！」她又稱體重已回復正常，五月才會完成打戲，更自爆有狂迷向她索取用過的紗布：「之前拍戲整傷腳，用紗布包紮，拍戲時要着厚戲服同絲襪，仲要拍成十幾個鐘，估唔到有人咁重口味，網上留言要呢啲嘢，不過我本身冇體味，幫唔到佢。（有冇人問你攞私人物品如內衣？）女仔要求都會OK！（男仔呢？）冇試過，問到都幫唔到佢！」
文：名人組