伍姑娘被霸氣如妃嚇窒

伍姑娘大笑姑婆形象鮮明，但於新劇《金枝慾孽貳》來一次破格演出「唔准笑」，於後宮中與鄧萃雯、蔡少芬大鬥法。原來今次伍姑娘主動出擊向高層曾勵珍自薦演出，她說：「有啲嘢係要自己爭取，唔係你喺ＴＶＢ做得耐人哋就要搵你！自己睇《金枝》已經好鍾意，聽到話《金枝貳》搵演員，自己就走咗去搵珍姐，問佢有冇角色啱我演。珍姐好了解我為人，知我大情大性，珍姐話：『好呀，等佢哋睇吓！』後來就收到監製戚其義通知。」

有壓力匿埋背對白

伍姑娘飾演的太妃貫穿兩集故事，後宮恩怨情仇由她無是生非而起，她最欣賞「神級拍檔」戚其義與周旭明描寫人性陰暗一面，但對着四、五頁紙的長對白，愛笑的伍姑娘亦笑唔出：「對白閒閒地四、五頁紙，監製要求一take過。最初講對白緊張到口震，仲點會笑得出。」提到鄧萃雯拍攝時壓力大得患情緒病，伍姑娘說：「後來睇報紙先知，當時又唔覺得佢有異樣，或者當時留意唔到。嗰陣開廠個個都好似女鬼咁匿埋喺啲角落記對白，大家都好大壓力，氣氛好沉重。」一向天不怕地不怕的伍姑娘竟然驚如妃，她說：「雯女平時好Nice，但化好妝、着起如妃戲服，就有一股如妃攝人霸氣，好邪！起初都驚o架，要一個禮拜先適應到。」

伍詠薇於劇中無是生非，宮中連場風雨亦因她而起。

伍姑娘坦言與雯女做對手戲有很大壓力。

從影以來最高難度

《金枝貳》是伍姑娘從影以來最高難度劇集，但相對滿足感也很大。她說：「自己第一次做清裝，未拍之前已經喺屋企攞住絲巾睇中國、法國嘅古裝劇學行路，其實都好開心自己仲可以咁勤力，哈哈。」伍姑娘不敢定案《金枝貳》是否她的代表作，要留白給觀眾下定論，她笑說：「我有諗過o架，但係驚愈諗愈唔係，無心插柳好啲，所以都係收聲唔講，只可以講滿意自己表現，同埋有份唱主題曲、插曲，已經覺得好完美。」

文：影視組

攝：劉智源

服裝：Lane Crawford

髮型：Nichol Yip@HAiR

化妝：Jovy Yiu@Make Up Forever Academy

場地：Red Bar+Restaurant（IFC）