唐詩詠自困廁所：辛苦到死
「梅妹」唐詩詠於新劇的「紅衣女鬼」造型陰森恐怖，敬業的她表示為投入角色，拍攝前自困廁所180分鐘，並大嘆過程辛苦又想死，更黐膠水化四十歲「老妝」，令其白滑皮膚增添兩條皺紋，可謂相當大犧牲！
向來形象斯文的唐詩詠於無綫劇《神探高倫布》大突破，飾演高大喜（黎耀祥）初戀情人「梅妹」的她，上周首以「紅衣女鬼look」亮相，行徑古怪疑精神分裂的她，令人感到心寒外，更獲不少觀眾大讚演技有進步。
詩詠透露為投入角色，曾經閉門自困180分鐘：「因為『梅妹』曾有困喺地牢三年，而我完全冇呢方面嘅經歷，咁啱陳志健有做開呢方面嘅義工，所以我就透過佢搵咗康復中、康復咗、甚至唔知自己患病嘅人傾偈，明白到佢哋嘅諗法。之後，我又嘗試將自己困喺廁所入面，初頭嗰半個鐘已經想死，出面發生咩事都唔知，喺裏面諗好多嘢，呢個角色嘅經歷實在太慘。」
膠水黐面
由於「梅妹」的角色設定為四十多歲，現年31歲的詩詠為說服觀眾，在造型方面「犧牲」不少，她笑道：「我用膠水黐咗好多皺紋，造型上都幫助好多，令到我好入戲。（膠水好傷皮膚？）真係，搞到我已經出咗兩條紋，化妝用咗兩個鐘，之後焗住拍足全日，幕後都盡量一日安排拍兩場左右就畀我抖下。」問到可會夠膽再扮老？詩詠則嘆一口氣笑說：「真係唔知，我未敢諗住。」
習慣性感
早前詩詠於劇中露背色誘祥仔一幕已播出，原來「好」戲在後頭，分飾兩角扮「梅妹」囡囡的她，稍後既要拋胸又跳艷舞，她說：「今次真係豁出去，從來自己好少低胸，初初見到件衫時，我都問『係咪要咁低胸？』但過咗第一步後，完全唔使再說服我，之後仲着低胸短裙對住台下四個男人跳艷舞，既然佢哋都覺得需要我就做。」
文：影視組
攝：秦健輝
場地：CQB PLAZA全天候室內近戰中心