盧海鵬詹瑞文玩煽情 淚鬥淚

「扮嘢始祖」盧海鵬及詹瑞文六月將踩入紅館，舉行一連兩場「盧海鵬×詹瑞文紅館奇幻扮嘢大典」，製作人丘亞葵指鵬哥是扮嘢宗師，詹Sir則為扮嘢大師，相信兩師匯聚必笑聲不絕。問二人合作可有拗撬？丘亞葵說：「絕對冇，因為詹Sir好尊重鵬哥，亦係佢提議搵鵬哥，除咗想致敬，亦想挑戰鵬哥，佢哋係不謀而合。」

分享人生經歷

日前二人拍攝造型照，分別扮徐小鳳、羅文及畢彼特，維肖維妙。問丘亞葵可擔心鵬哥屆時會爆粗「試咪」？他說：「本來我哋有構思過搞『試咪』一part，但唔怕鵬哥會當眾爆粗，因為佢好專業，所以可以畀六歲以上小朋友入場。」他又稱屆時有一部分是二人講人生經歷：「嗰part係催淚嘅，好感人同煽情。」

盧海鵬再扮畢彼特，與詹瑞文搞笑互睥。（黑白圖片）

兩位扮嘢高手開騷，必令觀眾又喊又笑。

丘亞葵強調今次是扮嘢歌舞騷，鵬哥及詹Sir又唱又跳，絕不咪嘴。問到鵬哥可有特別要求？丘亞葵說：「佢要求我哋早啲畀嘢佢，好似歌詞、音樂同造型咁，因為佢要記歌詞，所以要早啲畀佢準備，依家都陸續畀咗啲初步造型鵬哥，佢話第一次踏紅館唔衰得！」他又稱兩大扮嘢王屆時會扮多位名人紅星：「好似徐小鳳、Psy、四大天王等，亦會扮一啲受注目嘅人物。」

曾多次穿波點長裙扮小鳳姐的盧海鵬，拍攝時駕輕就熟。

放大圖片

邀內地扮嘢王

今次扮嘢騷亦打算招攬全世界扮嘢高手，他謂：「內地有啲扮嘢高手扮梅艷芳同張國榮都好似。（用幾多錢招攬高手？）未傾，但最緊要好睇。」他又有意邀鵬哥胞弟盧海潮上台：「佢喺廣州有名氣，同鵬哥好似樣，考慮緊有一部分係佢哋兩個一齊。」

文：音樂組