港姐唔驚「死」再搞普選
2013年度港姐今日開始接受海外招募，上年的一人一票選冠軍臨門一腳死server，爛尾收場，成為年度笑話。昨日，應屆港姐張名雅、黃心穎、朱千雪和無綫非戲劇製作總監余詠珊等出席記招，余詠珊表示今年會「再接再厲」，繼續投票機制，但細節仍在商討。
應屆港姐冠軍張名雅、亞軍黃心穎、季軍朱千雪（Tracy）、旅遊大使湯洛雯、最上鏡小姐岑杏賢和無綫非戲劇製作總監余詠珊等，昨日在尖沙咀出席《2013香港小姐競選》海外招募記者會。
去年無綫大搞Gimmick，大搞普選港姐，但臨門一腳down server，淪為笑柄，更被網民鬧爆，「經手人」余詠珊表示今年會「再接再厲」繼續投票機制，她說：「一路都諗有咩新方法，首先今年會加番準決賽。（都係一人一票？）傾緊，機制會有啲改變，不過都係同投票有關。（唔只電話投票？）可能再多啲！細則仲傾緊，所以未講得住。」她亦指會避免到打仗和有流感的地點拍外景：「諗緊，不過一定係吸引嘅地方！」
朱千雪搵阿妹復仇
谷出兩吋事業線的黃心穎，是眾女中最性感，她笑言：「因為肥咗，依家要好好珍惜，減咗就冇！目標係減6-10磅。」而張名雅、黃心穎、湯洛雯和岑杏賢均稱會慫恿朋友參選，而上年大熱倒灶的Tracy指不怕再次down server，更會先向兩個妹妹落手，她謂：「之前視帝、視后試咗都work，對公司有信心！（叫妹妹同你爭番個冠軍？）對佢哋有信心，我會好好訓練佢哋！（靚唔靚？）佢哋高過我、瘦過我！不過要等佢哋讀完書先。」
文：影視組