中基千嬅 啜「新」忘「舊」
楊千嬅與鄭中基（Ronald）這對舊情人，前晚分別於金像獎開齋封影后及最佳男配角，二人雖被大會把舊情擺上枱，仍無損興奮心情，完騷後二人帶同另一半風騷出席慶功，不約而同於人前咀嘴晒恩愛！千嬅直言預咗被玩，但眼見對方現時幸福美滿也很感恩，Ronald也笑言不欲弄皺千嬅靚裙，才未有抱抱舊愛！
「第三十二屆香港電影金像獎頒獎禮」前晚圓滿結束，各大獎項已塵埃落定，楊千嬅憑電影《春嬌與志明》開齋封后，獲一眾圈中好友如舒淇、余文樂等於微博恭喜，無獨有偶，千嬅舊愛鄭中基（Ronald）則憑電影《低俗喜劇》獲「最佳男配角」，大會還刻意安排千嬅負責頒獎，而千嬅領獎時，司儀之一的林家棟把二人緋聞擺上枱，令這對昔日戀人於鏡頭前表現尷尬，最後兩人只禮貌握手打圓場。
讚老公夠大方
騷後，千嬅拖老公丁子高拉大隊慶功，內地演員張國立、徐帆、拍檔余文樂、劉偉強等也有現身，徇眾要求下，千嬅與丁子高多次作狀咀嘴。事後被問到為何於台上忘記感謝老公？千嬅笑言雖然舞台經驗豐富，但沒想過也會有緊張時候：「上到去成個人空白咗，唔好話老公，連余文樂都唔記得多謝，落到台先知大鑊，好在老公夠大方，話知道我事業為重，真係好開心。」獲獎後，千嬅第一時間致電回家報喜，沒料未夠1歲的囝囝，於半夜時分仍眼仔睩睩。
問千嬅如今貴為影后，會否趁機加片酬？她跟已4奪影帝的梁家輝口脗一致，斷言表示不會加薪：「我簽包薪，片酬固定咗，仲叫公司唔好亂加，驚冇嘢做，要同市場共同進退。嚟緊我會再同彭浩翔、杜琪峯合作，預計休多2、3星期，養好身體再開工。」她又直認待完成今年工作，想為丁家追多個。她又否認頒獎給Ronald時表現尷尬：「出得嚟行預咗要還，上得去頒獎都知佢係大機會，一個朋友睇住佢成長，幸福美滿係福氣，好感恩，不過我都係今日（前晚）活動前先知頒邊個獎。」丁子高則笑言千嬅忘了在台上向他致謝，會以生仔來「懲罰」千嬅，又稱打算為愛妻舉行私人派對慶功。
預告再闖歌壇
另邊廂，Ronald與太太余思敏恩愛出席大會慶功宴，興奮作狀咀嘴。對於與千嬅的舊情被玩，他說：「冇唔開心，唔介意，大家都已經係Daddy媽咪，玩咪玩囉，係唔好意思，cut咗千嬅講嘢，老婆都冇詐型。」問他為何於台上只跟千嬅握手？他說：「人哋條裙咁靚，攬皺條裙就唔好。（生B慶祝？）睇老婆啦。」他更指暫不會加片酬，而他亦已簽新唱片公司，準備今年再出唱片。之後，他再出席太陽娛樂文化慶功，連踩兩場。
文：影視組