荷里活著名男星湯告魯斯（Tom Cruise）最近為了宣傳科幻新片《攻‧元2077》（Oblivion）而四出宣傳，前日他就上名嘴Jimmy Fallon的清談節目受訪。去年在節目玩遊戲互潑水之後，今次改玩雞蛋打頭來搞氣氛。
靚佬湯在節目中與Jimmy Fallon玩類似俄羅斯輪盤的遊戲，要輪流在十二隻雞蛋（有四隻生蛋及八隻熟蛋）當中揀一隻向頭自擲，結果靚佬湯連續兩次都揀中生雞蛋，結果搞到成個頭都是蛋汁，十分狼狽！雖然慘變「污糟貓」，但靚佬湯仍四萬咁口並向Jimmy說：「我同你講過啦，都話心知不妙。」認真玩得！
而之前一晚，靚佬湯就上另一名嘴Jimmy Kimmel的清談節目宣傳，在節目中靚佬湯大晒演技「chok聲」扮認真講一些無厘頭說話如：「有無方法搵到湯及沙律？」
而他亦有回應早前有兩名女fans為他追溯他九世紀祖先的身份，結果發現原來靚佬湯的愛爾蘭祖先好巴閉，當年控制愛爾蘭首都都柏林大部分地方，就連靚佬湯亦表示好驚喜。
限制傳媒採訪
另方面，有指靚佬湯上周出席《攻》美國首映禮前列出清單禁止曾報道女兒蘇莉（Suri）及科學教失實報道的傳媒到場採訪，當中包括《The Hollywood Reporter》及《In Touch》雜誌，後者曾指靚佬湯在離婚後拋棄女兒。
文：外娛組