莊思敏自我「增值」抗疫
內地H7N9禽流感疫情持續擴大，來自中東的新沙士亦來勢洶洶，藝人無可避免也會到內地工作，對新型病毒可謂避無可避！除了在港自行防疫，兩位食腦的「宅男女神」各有睇法，周秀娜寧捱冰鮮雞，也不吃鮮雞，一刀切避疫；莊思敏則認為增強個人抵抗力對抗病毒最有效。
《護膚品活動》
模特兒莊思敏：「多啲留意個人衞生，返內地工作就小心啲飲食，盡量唔好食雞、鴨、鵝，仲要增強個人抵抗力，亦要有公民意識，有少少唔舒服就去睇醫生，同埋唔好返工。」
華姐朱璇：「我個人好安全，一向都好少去人多嘅地方，同埋勤力啲洗手；如果工作要去上海，惟有小心啲，注意多啲衞生。」
名模姚書軼：「我係超級大菌，唔怕啦，一啲都唔擔心，可以大菌食細菌嘛。平日出入會洗手，唔去人多擠迫嘅地方。」
《時裝活動》
歌手陳逸璇：「我會少食雞，一向唔多去街市買餸，都OK，會多啲留喺香港，少去內地，不過遲啲上海有個Jazz音樂節，好希望去到。」
《Moiselle Fashion Party》
雪兒：「我好鍾意飲滾水，唔知可唔可以殺菌？遲啲會去日本浸溫泉，希望溫泉都可以幫助殺菌啦。」
潮人何嘉莉：「少食雞和豬肉，會食多啲牛肉，平日一般衞生會做足，洗手消毒之外，我覺得衫都要洗得乾淨啲。」
《馬場活動》
宅男女神周秀娜：「政府都有做預防措施，自己都放心，但雞同豬呢排會食少啲，寧願食冰鮮雞，都唔食新鮮家禽。早排整親仲休息緊，都冇亂食嘢。返大陸都冇擔心過，最緊要注意個人衞生。」
《珠寶晚宴》
名人丁子高：「屋企依家已做足安全防疫，洗手和消毒之外，自己有少少唔舒服就會食維他命C，不過遲啲我要去上海做嘢，我準備咗防疫衣，返香港後會全身消毒，如果有啲唔舒服就會自我隔離，唔想傳染個仔。」