苟芸慧惹殺身禍 王君馨亂爆粗
無綫藝人王君馨和苟芸慧（苟姑娘）均在外國土生土長，中文水平欠奉，所以在聽、講廣東話時經常鬧出不少笑話！苟芸慧不知「殺你」有「OK」的意思，還以為別人真的動了殺機；王君馨則少不免有失斯文，不經意爆粗。
首次見面同場比舞
苟：第一次見面，就係選美嘅時候，因為君馨係我參選華姐嗰年嘅表演嘉賓，你嗰陣同吳卓羲要唱《熱情的沙漠》，哈哈！
王：係呀！當時一半嘅女仔係同吳卓羲跳舞，另一半就要同我跳，咁啱你就係拍住我一齊跳。
苟：我記得好清楚，我當日病咗冇乜力氣，但君馨畀咗好多耐性我，搞到佢跳舞嘅動作要跳得heavy啲，我就跳得輕鬆啲，好彩最後個效果出到嚟都唔錯！
王：嗰年跳舞好難，因為着住對鞋嘅鞋底有鐵，擦個地板係有火花，所以都幾大挑選！我記得最初見到你哋參選嗰廿八個女仔，已經覺得你好靚，應該入梗三甲！
苟：我覺得你都好靚，對眼好似識講嘢咁，加埋你個body language，呢樣嘢係好少女仔可以有！
語文理解最大挑戰
苟：我哋喺外國返嚟，唔單止係學中文咁簡單，仲要學習中國文化，好多人講一句說話，可能蘊含好多意思。所以我有一段時間都變得好掙扎，而且會諗多咗嘢，例如會諗嗰句說話有正面意思定係反面意思呢，呢樣嘢對於一個鬼妹仔嚟講係一個好大嘅挑戰！
王：同埋唔好驚了解錯個意思，因為不知者不罪，所以唔好畀自己一個好大壓力。
苟：我記得我啱啱入行，啲人就話：「得閒飲茶！」但之後冇一次真係飲茶。呢樣嘢我以前會唔明，因為以前講出嚟嘅嘢，真係會做！後來先慢慢明白係「See you later」嘅意思！之後我哋拍劇集《荃家福祿壽》，當佢哋講「殺你」嘅時候，我都唔明白，仲心諗：「做乜要殺我？」
王：嗯‥‥‥我都明白，有時我哋咬字唔清楚，都會唔小心講咗粗口，呢啲係最唔好意思，尤其喺前輩面前，哈哈！
苟：呢個都係我之前嘅壓力，因為公眾人物影響範圍好大，例如會影響到啲小朋友，但愈係着緊一樣嘢，就會愈講多錯多。
王：我記得第一次嚟香港，要去鰂魚涌跳舞，我將「鰂魚涌」講咗做「拮魚春」，搞到畀我問路嘅先生都唔知我想去邊。去酒樓仲搞笑，我嗌「燒賣」，我又講咗「燒米」，而「蛋撻」我又講咗「蛋卡」，「夏枯草」講咗做「合枯草」。
苟：我完全明白，因為會將英文同中文撈亂，好似我將「芒果」講成「Man果」一樣。
王：同埋我喺美國講咗咁多年，都冇人correct我！以前講「蛋卡」同「合枯草」，個個都明白我講乜‥‥‥
苟：不過比較起嚟，你真係勇敢好多，至少你會願意去講。好多時我搭的士，寧願叫人send個message嚟，然後指個地點畀司機睇！但其實應該好似君馨咁，不停挑戰自己，畀多啲信心自己講中文。
後記：
王君馨與苟姑娘曾被捧為女神，同時亦被網民踩得體無完膚，評價時好時壞。不過兩人之間有個妥協，就是不易被別人動搖自我價值，君馨說：「有次同苟苟出席電影首映，呢啲場合通常會見到好多電影監製、演員，好多時會希望人哋欣賞你，但我同苟苟都希望做到唔會因為得到別人欣賞而令自我價值提高，得唔到別人嘅認同就令價值變低！」苟姑娘續說：「嗰日我哋仲主動去觀察周邊啲人，結果過了一個開心嘅晚上！」
文：文珊
攝：黎國輝
服裝：Twist
化妝：Henry Li
髮型：Thomas@HH