苟芸慧黐實呂慧儀阻人拍拖
緋聞多多的宅男女神苟芸慧自認爛桃花纏身，日前沒有觀音兵相陪，苟姑娘化身「電燈膽」孖住呂慧儀夫婦行街，慘遭冷落的呂慧儀老公黃文迪陪行一陣後冇癮離開，由得兩女同行慢慢講心事。
無綫小花苟芸慧早前和郭富城的緋聞鬧得熱烘烘，未幾又傳出她與潛水教練撻着。自認爛桃花纏身的她，雖然緋聞帶挈接了不少新工作，但豬籠入水同時亦惹來很多煩惱。苟姑娘避桃花唔敢再約男仔，日前惟有搵老友呂慧儀傾訴心事，不惜死黐「介入」呂慧儀和老公黃文迪之間，成為大大個「電燈膽」。
戴眼鏡遮素顏
當日下午四時許，備受緋聞纏擾的苟姑娘懶得化妝，素顏戴眼鏡現身中環，面容殘爆。苟姑娘會合呂慧儀兩公婆後，立即捉住呂慧儀傾唔停。為照顧情緒受困的苟姑娘，呂慧儀不得不冷落老公，黃文迪惟有獨自一人行在兩女身後，猶如一名大隻保鏢。三人行了一段路後，呂慧儀終於察覺拋低老公太久，主動地一手翹苟姑娘，一手拖老公，三人一字排開霸晒半條路。
黃文迪主動閃
未幾，身處尷尬位置的黃文迪，眼見二人世界遭破壞，仍然識做地主動離開，以免老婆左右做人難，由得兩女慢慢傾。苟姑娘「獨霸」呂慧儀後繼續傾到忘形，兩女步入名店行了一陣，然後齊齊孖住去洗手間，全程雞啄唔斷。
文、攝：追蹤組