陳嘉桓出師不利 闖韓爆篋
陳嘉桓（Rose）昨日在南韓拍攝旅遊節目，撞正南北韓局勢緊張，隨時有開戰可能，但大隊無意撤離，Rose只好頻頻WhatsApp家人報平安，而她去到當地又爆篋，令她自嘆黑仔。而剛在南韓拍完特輯的錢國偉，覺得戰爭陰霾不會影響港人到南韓旅遊的意欲。
陳嘉桓與有線主播衞志豪昨日在南韓為有線拍旅遊節目《快樂地球》，由於正值南北韓局勢緊張，外界推測北韓或會於日內對南韓發射導彈，Rose亦擔心自己的安全。
勤發短訊報平安
Rose表示：「我哋要喺南韓拍到4月18日至返香港，我聽到話可能開戰都好擔心，當地導遊都話情況唔樂觀，但大隊暫時冇計劃要提早走，今日（昨日）我哋出去拍嘢，市面好平靜，旺區有好多香港遊客。之後我哋會去釜山拍攝，我都驚香港嘅屋企人擔心，所以去到有wifi嘅地方就WhatsApp報平安。其實我呢次都幾黑仔，嚟到南韓第一日就爆篋，要買過。」
有線的發言人則表示：「已經密切注意南韓局勢，會以同事安全做大前提，但暫時未有特殊情況，拍攝繼續。（保險唔賠戰爭損失？）我哋會了解緊細節，我哋買嗰份應該保埋。」
另外，上月尾在南韓拍完旅遊特輯的錢國偉說：「我忙緊剪片，6月喺RoadShow播。（有指未來數月香港人都唔敢去南韓？）仲有兩個月，就算真係打仗都唔會拖到咁耐，唔會影響到我哋播出日期。」
文：影視組