憶蓮主動擔抬 Jun除衫梳乎

憶蓮近年不時跟御用樂手男友Jun四出巡唱，實行寓工作於拍拖，但2月底時，這對「姊弟戀」自拉斯維加斯做完騷返抵香港機場，估計兩人發生「小風波」，憶蓮當時雖和男友同機又同路返家，但她表現忟憎，獨自坐保母車離開，而被「撇」的Jun惟有扮風騷笑住面對傳媒，惹兩人情變疑雲。

沿途扮「唔熟」

事隔個多月，前晚有讀者報料，指憶蓮跟Jun完成4月3日多倫多唱會後，就到蒙特利爾度假，再經多倫多乘坐CX829商務客位齊齊返港。昨早清晨5時35分，打扮樸素的憶蓮跟戴上紳士帽及膠框眼鏡的Jun，各自推住行李車現身抵港大堂，初時兩人肩並肩同行，但快到閘口時，兩人先四處張望再玩避忌，相隔幾個身位出閘，並全速向停車場方向進發。雖然兩人沿途扮「唔熟」，但又忍不住偷望對方，以眼神代替蜜語，粉碎分手傳聞！

彈開出閘 出閘後二人分開行，憶蓮每見有途人路過，例必「睥行」看清楚是否記者。

不為所動 憶蓮吊高雙手仍未能閂車尾箱，在旁的恭碩良，只顧脫外套，未有幫手。

到達停車場後，憶蓮同Jun見四下無人，終放下戒心回復情侶身份，司機適時出現，本來搭了長途機疲憊不堪的憶蓮，有男友及司機在旁其實大可翹埋雙手上車等人善後，但為愛郎甘願做「阿四」的她，竟「自動波」抬重甸甸的行李上車，又一手拎起男友行李上的結他放入車尾，相當操勞。

唔多夠力 憶蓮生得唔高，拎大結他上車的她顯得十分吃力。

兩人下車後齊齊步出，恩愛回家。

齊齊回香閨

反觀身形高大的Jun只企埋一邊，手挽行李等女友接手做「苦力」，期間憶蓮和司機合力將所有行李搬上車，Jun清閒到除外套，手搭行李車擺chok甫享受做「監工」的大男人優越感。憶蓮花約10分鐘才完成執行李「任務」，見女友大汗疊細汗，Jun輕扶憶蓮纖腰上車作為「獎勵」。最後，憶蓮的7人車直駛往其赤柱的香閨，保安見有傳媒車尾隨，即時拉閘，並以私人地方為理由拒絕入內，憶蓮和Jun則一同下車步入屋苑，終可休息不用再次為男友搬行李。

文：音樂組　

攝：追蹤組