馨香鬥傻
兩位「鬼妹仔」王君馨與岑麗香雖非同期入行，卻因同樣鬼聲鬼氣而friend到爆燈，二人經常發明鬥傻的相處之道。雖然她們看似只有開心，沒有憂愁，不過原來香香初到香港時，曾因人生路不熟而封閉自己，幸得君馨在深淵扶她一把，難怪她們成為苦樂與共的真朋友。
王：王君馨（Grace）
岑：岑麗香（香香）
記：記者
初結識喊唔停
岑：第一次見你，唔知係咪喺演唱會後台，雖然當時未識你，不過你已經好friendly。而第二個印象，就係見到你喺教會rap歌，我知你係鬼妹仔，但你竟然rap中文歌，覺得你好勁呀！
王：嘩！我唔知你嗰日喺度呀。反而我對香香嘅第一印象係喺2011年台慶，因為我哋一齊排舞，我覺得呢個女仔好cute，第一次見你已經有個感覺，就係好想照顧你。之後李亞男話，諗住帶埋香香去布道會，當時我嘅第一個反應係：「好呀，我都好想同佢做姊妹呀。」
岑：我記得去布道會嗰日喊咗好多次，啱啱入行嗰時係好難過，因為我初嚟香港，好多嘢都唔適應，人又唔識多個，冇乜安全感，我覺得所有朋友、屋企人嘅愛都離我好遠。所以遇到君馨之前，好耐都未試過有真友誼嘅感覺。
姊妹扶持香香
王：我哋亦都好開心香香願意分享佢嘅心聲，其實我知道鬼妹仔嚟香港真係會好辛苦。
岑：我記得嗰日係好特別，因為冇乜點講嘢，但我哋一齊已經感受到一種信任，所以好難得。當時我真係街都唔想出，因為出街完全認唔到路，就算睇路牌都讀唔到，開網上地圖又唔識睇中文字，所以就唔出街。不過，兩位師姐真係好明白我，仲同我一齊面對香港呢個陌生地方。
王：之後我哋加入咗鍾嘉欣同苟芸慧，但我有時約唔到五個女仔一齊，就會單對單咁約。有時我會約香香上我屋企，一齊整健康嘅食物。
相約食健康餐
岑：我哋勁鍾意食生果同果仁，有時我買果仁都會諗起你。
王：係呀，當我成屋都係生果嘅時候，我就覺得係時候要叫你過嚟。
岑：（狂笑）我嚟，真係老實不客氣。
王：放心，你喺我屋企係唔需要客氣。其實我知你過嚟係想食乜，所以我都會安排好晒啲食物，然後鼓勵大家食得健康啲。
自誇唔使減肥
岑：其實我哋喺香港會畀人話肥，但我哋呢種身形喺外國已經算太瘦，所以我哋冇減肥壓力。因為圈中又冇乜圓碌碌嘅人，而且我覺得包包面係一種福氣。
記：你哋最欣賞對方嘅乜嘢？
岑：我好欣賞Grace嘅真，因為你可以好舒服咁做自己，而且一諗到啲乜，都可以直接講出嚟，而且你又唔會批判我，又會識得尊重我。
王：我就好欣賞香香嘅簡單，你有啲好傻豬嘅嘢好好笑，仲會講啲無聊笑話，令到我都好想有啲傻氣。
岑：（喪笑）你可以撻着我嘅傻氣，呢樣嘢係令我最開心，但我嘅傻氣你又唔會視之為傻氣，因為你都會笑，呢樣嘢係最好。
王：咁咪好似小朋友咁，因為小朋友係最簡單、最容易滿足、最容易開心。每次當我諗嘢諗得太複雜嘅時候，都會諗番起香香嘅簡單。
岑：其實你最大嘅優點係你好鍾意照顧人，寧願犧牲自己嘅時間去照顧我哋呢啲師妹，你會用好多時間去幫我哋諗，原來我哋喺你心目中係有咁重要嘅位置，所以我都好感動。
後記：香香扮鬼氹君馨
香香說君馨能夠撻着她的傻氣，並非空口講白話。事緣在訪問期間，攝影師叫香香扮鬼臉氹君馨笑，香香即感到雀躍萬分，她邊伸出兩隻手扮鬼，邊發出怪聲，本來君馨是忍笑能手，但見到香香如此傻氣，也忍不住大笑起來。可見香香的傻氣可感染其他人，如能夠找到個跟她同樣傻氣的人，然後把無聊笑話視為快樂泉源，這就是最幸福了。
文：文珊
攝：秦健輝
化妝：Stephen.L
髮型：Patrick@HH Salon
服裝：Blues Heroes