文恩澄愛貓受襲 求助警方
新城DJ Ben前女友、歌手文恩澄（Rannes）最近受鄰居瘋狂滋擾，她受訪時稱在過去六個月內，鄰居投訴她在大埔村屋的單位內腳步聲大外，每周都向村屋管理員投訴其四隻愛犬狂吠擾民，令Rannes感不勝其煩：「我一年前搬入嚟，住咗3個月後，佢就話我行路大力發出聲響，但位鄰居住喺我樓上，我點會嘈到佢，之後位鄰居同佢大女，喺凌晨一點衝落嚟鬧，話我啲狗吠到佢哋，當時我都好有禮貌咁同佢了解情況同道歉，仲留電話畀佢，叫佢下次再嘈可以打畀我。」
Rannes為免狗聲擾人，花費裝隔音措施，惜投訴卻是有增無減，鄰居照舊向管理員投訴外，又發信去其他幾十戶鄰居指出其「五宗罪」。近日更發生其愛貓受襲事故，Rannes說：「貓貓爬上屋簷，我懷疑有人用水壓水喉射佢，嚇到隻貓跌落地仲拐吓拐吓咁行，呢個我真係嬲，但我都忍住。」
考慮約滿搬走
鄰居曾報警投訴Rannes噪音滋擾不獲受理後，上周竟向愛護動物協會（SPCA）投訴她「虐畜」：「啲職員嚟到都話我啲寵物好健康，前任管理員同我講投訴嗰個人唔止一次投訴到人哋搬屋，佢亦都話我間屋其實好靜，唔係我問題，可惜呢個管理員最後亦被人投訴到辭職。」她表示為了寵物安全，已向警方和SPCA備案，必要時亦會在約滿後搬走：「其實真係唔知得罪佢哋咩嘢，又唔同我溝通，令我好困擾，希望唔好愈來愈過分。」
文：外娛組