鄭中基醉聽話 焗住返歸
鄭中基（Ronald）約滿金牌大風後，決意自組公司在影圈大展拳腳。成日話怕老婆會發達，Ronald日前孖老婆余思敏和友人夜蒲尖沙咀，飲完一Round的他意猶未盡，還想再喝過杯底朝天，可是在老婆一聲令下叫停，Ronald惟有做乘客，乖乖上車返歸。
自上月底約滿金牌大風後，Ronald決定撇甩「太子仔」之名，不再跟公司續約，還決定外闖自組工作室，在影圈發圍，圖圓導演夢。向來好杯中物的他，自與女主播余思敏拉埋天窗後，已開始收心養性，加上女兒出世，Ronald完全被兩個女人馴服，乜都聽晒老婆話，實行等發達。
飲到行唔穩
日前凌晨一時半，只見Ronald的座駕泊在尖沙咀，未幾見飲到腳步浮浮的Ronald從樓上吧步出大廈，同行除了有余思敏傍住外，還有數名男女友人。儘管Ronald已飲到面紅紅，似乎意猶未盡，更高呼：「仲去邊度飲？」，一於再來多Round。
要老婆攙扶
可是Ronald如意算盤最終打不響，當問完朋友是否再劈過時，余思敏見勢色不對立即叫停老公，還不畀面當街着令Ronald：「上車啦！」登時當頭棒喝一樣喚醒Ronald，而Ronald亦在老婆攙扶下上車，由司機開車返回住所。
文：專案組 攝：追蹤組