黎明嚇親女孩 蝕賣法拉利
黎明以500萬元購入「至愛」法拉利458 Italia超級跑車，戰車落地兩年多便割愛蝕讓！據知因該車引擎聲太大，出入時嚇親鄰居小女孩，他除了送果籃道歉外，更蝕讓愛驅免影響鄰居，並以400多萬元購入一部引擎聲較細的Bentley跑車陪他遊車河。
身家豐厚的天王黎明與郭富城同樣是超級跑車迷，曾經擁有五架辣跑的他對法拉利情有獨鍾，先後擁有F355、F360及F430的首批跑車，2010年他又豪擲500萬元購入法拉利458 Italia型號黑色超級跑車。本報獨家拍得他旗下唱片公司高層及助手親自到鴨脷洲代他驗收，並掛上他鍾愛的「R1VA」自訂車牌，盡顯「新寵」地位。
不想影響他人
據知，黎明平時忙於工作，故晚上夜闌人靜時，才駕駛深愛戰車離開上水雙魚河St.Andrews Place獨立屋豪宅出外兜風，感受超級跑車威力，不過本報早前發現黎明已將愛車忍痛蝕讓。據悉，黎明的住所低密度兼環境清優，早前出外兜風後駛返獨立屋豪宅，當他駕駛時，引擎聲發出的低頻即傳到鄰居家中嚇親小女孩，為顧及鄰居感受，黎明不惜割愛。
黎明於電話中承認賣車一事與鄰居有關，他說︰「當時鄰居位太太喺度喊，於是我停車問︰『咩事？冇事嘛？要唔要幫手？』但該太太只吞吞吐吐講咗幾句︰『黎生，唔知點講，唔係幾好意思開口同你講。』於是我再三追問，佢先話︰『每次你開車出入都好響，我個女好驚呢種聲音，所以每次聽到都會喊。』」他得知對鄰居造成不便後，即時向對方致歉，翌日還送上生果籃向小女孩賠罪。他說︰「之後我諗架車雖然好鍾意，但自己又唔會搬走，加上呢架車出入會影響其他人，於是決定忍痛賣車。」
「寧靜」跑車代步
雖然黎明的法拉利有價有市，但為免影響附近的鄰居及小朋友，寧願急急蝕賣給車行，黎明說︰「今次賣車冇賺，蝕少少，如果自己私人放或者賣畀相熟朋友，應該唔會點蝕。但我唔想浪費時間，因為唔好再嚇親小朋友。」賣車後，他已火速找到「替身」，據知他早前豪擲逾400萬元購入引擎聲比法拉利靜一倍的Bentley名貴跑車代步。
文︰專案組