何傲芝見光死 彈甩蕭正楠

終於在無綫捱出頭的Edwin與何傲芝拍拖兩年多，不時被拍到出雙入對，早前又如連體嬰黐實出席黃長興婚宴，雖死撐只是「好朋友」，但關係早是圈中公開的秘密。有報道指何父對千金愛護備至，希望女兒嫁得好，與Edwin則交流不多，似對Edwin的成就未感滿意，令兩人關係出現暗湧。事業最近有起色的Edwin月前豪花逾400萬元置業，但要冧掂「未來外父」，相信仍要繼續努力。

場內親暱玩自拍

前日下午Edwin、何傲芝與妹妹何傲兒，以及李思捷、高鈞賢等幾位圈中人現身沙田馬場支持馬主好友，戴上黑超的Edwin及傲芝在沙圈時表現親暱，拿起手機自拍，其後返回大堂時發現記者，傲芝即以「光速」向左閃，拋下男友與傲兒等，Edwin則縮到最後向右走，兜了一個大圈才會合眾人，仍未肯大方合照公開二人關係。

速閃的何傲芝知道斷正後，即露出尷尬笑容。	本來向前行的蕭正楠，突然打橫向右邊走。	有傳前馬主何父對蕭正楠唔多滿意。

賣口乖擦何父鞋

事後兩人分別接受電話訪問，問到何以如此避忌？Edwin說：「可能之前有新聞，佢（傲芝）有啲避忌。（唔見何父？）我又唔知，要問番佢哋，可能佢呢排忙。（入場支持何父？）唔係，我有朋友有馬出場，所以約埋一齊捧場，我自己好少入馬場，佢兩姊妹多啲。（報道對你哋有影響？）本來無一物，算啦！」但Edwin不忘賣口乖，大讚「Uncle」好人，有指點他關於馬匹的知識，從對方身上學到不少東西。

而傲芝卻透露前日父親也在場，但因各有各朋友而沒有見面：「大家唔同位置，所以冇刻意見面。（爹哋唔鍾意你哋交往？）唔係，唔好咁講，不嬲畀好大自由度我哋兩姊妹，唔過問私事。（想你嫁個有錢人？）佢唔係咁嘅人，我19歲已經涉足馬圈，要識都唔係依家啦！」

文：影視組