黎明金句解畫：好普通啫
黎明前晚出席宴會，對於新歌《我可以忘記你》被指是他離婚後對前妻樂基兒憑歌寄意之作，他即發揮金句王本色，一輪嘴發功，拋出擲地有聲的金句，指唱歌係好普通的事，笑言一首歌過分解讀會「做唔到人」。
黎明（Leon）、曾志偉、黎瑞恩、陳展鵬、黎諾懿、林漪娸等前晚到灣仔會展，出席深圳社團總會就職典禮，心情甚靚的Leon被問到新推出的國語歌《我可以忘記你》中的歌詞：「付出的受傷的通通都是你 自私的殘忍的似乎只有我 可惜我並不難過」、「我可以忘記你 不怕想起 才算是勝利 沒有愛過你 我最愛是自己」等，讓人聯想他想憑歌向前妻樂基兒寄意，他即發揮「金句王」本色說：「我兩年冇唱過歌，唱歌係一件好普通嘅事，希望鍾意聽我唱歌嘅人鍾意首歌咪得囉！（憑歌寄意？）冇特別含意，唱一首歌諗咁多含意就好大件事，乜都唱唔到、行又行唔到、做又做唔到人o架喇！唱歌，就係鍾意唱歌咪唱歌，因為我係一個歌手，係應該唱歌嘅，希望大家鍾意首歌啦！」語畢即急步入場，未有再接受訪問。
志偉唔知點搞大壽
志偉本月14日60歲大壽，對於無綫計劃下周三為他搞「生日騷」，他自言一無所知：「我處於被動，剩係人去就得，所有人都係TVB請。佢哋好神秘，開親會都好多人喺度，我想問嘢就叫我快啲走唔好理，唔知想搞乜？」對於《好報》早前獨家踢爆，志偉為無綫監製的新劇《Aerobic Girls》（暫名），因葉玉卿老公胡兆明不肯放人，故計劃搵陳慧珊執二攤，志偉說：「套劇6月尾拍，仲聯絡緊好多人。」問他是否仍想搵葉玉卿出演？他說要先與卿卿老公隊番杯先有答案。他又指新劇講女性，認為香港需要這樣的劇集。他又指自己是監製電視劇的新丁，更謙說要向梁家樹學習。
文：影視組