美國女星姬赫遜(Kate Hudson)未知是否經歷過一次失敗的婚姻，搞到遲遲未與樂隊Muse主音、未婚夫Matt Bellamy拉埋天窗，但現時好彩仍幸福滿瀉，有仔萬事足的她更聲言定必會再次當人妻！
記：有冇事是你不願做的？
姬：我想沒有很多！如果要我諗番自己嘅人生，我願意把握唔同機會，而且我更加願意去嘗試唔同嘅關係！哈哈！
記：作為公眾人物你願意去相信別人嗎？
姬：我選擇去相信別人，原因係我根本冇任何東西要掩飾。我試過有朋友向我講大話，亦有朋友喺我背後做小動作，亦有朋友偷我嘢，不過都唔能夠阻止我去相信別人，唯一令我生氣係一啲人侵犯我兒子嘅私隱，真係值得咁樣做嗎？
記：你父母卻羅素（Kurt Russell）及高蒂韓（Goldie Hawn）都係明星，對你有咩影響？
姬：當你父母都係明星，好多人會誤會你入娛樂圈只為追求名利，不過我反而剛剛相反，當我父母係矚目嘅公眾人物，如果我唔係真心享受演戲，我會出盡力遠離一切名氣，但我偏偏熱愛表演。
記：為甚麼你身材總能keep住苗條？
姬：全靠不斷地做運動去保持，我會不停跳舞及瑜伽，仲會跑來跑去喺後面追實個仔。
記：你囝囝冰咸（Bingham Hawn Bellamy）已經識行識跑嗎？
姬：冰咸唔單止會行，仲已經識得出盡力向前喪跑！同埋佢將後面啲頭髮留到好長，跟80年代嘅卻羅素一模一樣，不過我就快會將佢剪掉。冰咸依家仲會唱歌添！佢好熱愛音樂。
記：大仔賴德（Ryder Robinson）呢？
姬：賴德係一個好出色嘅哥哥，好有耐性而且好識得包容人，當冰咸用力扯佢頭髮時，佢唔單止冇發脾氣，反而大笑，賴德係一個好人，我作為佢母親真係感到好驕傲。
記：兩個囝囝都如此出色，其實都係全靠你嘅功勞。
姬：你咁講令我諗起以前母親高蒂韓曾說過人生中只有一件事佢係拒絕失敗的，就係養育自己嘅子女，令你覺得一邊做自己開心嘅事，一邊撫養出令人驕傲、出色嘅仔女。
記：好似一切對你講都好簡單，其實有冇咩事係你覺得困難嘅？
姬：我份人經常都太有火，去追求好多東西，不過我從母親身上學識凡事退後一步，去真正感受當下正發生嘅事，即時常去冥想。