范冰冰永恒戰褸
永恒戰褸Trench Coat，易於配搭且能變奏出各種Style，一年四季兼甚麼年代都流行，反領、孖襟和腰間縛帶就是它的經典元素，最多只是隨不同年代在Cutting、物料和顏色上有所變化。例如今年就流行帶點Matellic閃令效果色彩的款式，難怪大受各地名媛女星追捧，紛紛以至潮Trench Coat示人。名模陳嘉容就大讚陳慧琳身形夠高，穿Slim cut款的Trench Coat都難不到她。而范冰冰雖然配件不多，但整體亦算搶鏡。
范冰冰
「着得幾靚，但襯對黑色高踭鞋同黑色手袋，感覺有啲沉悶，如換對金色、銀色甚至係Matellic黑色鞋同手袋會Sharp啲，或者加對耳環同戒指，會令成個Look靚啲。」
何超雲
「件褸個款OK，個顏色都好靚，佢皮膚夠白皙着紅色好Sharp，不過件褸就大咗啲，手臂位明顯睇到鬆咗，如果貼啲會好睇好多。」
金喜善
「好靚，簡簡單單，高貴大方，好穩陣嘅打扮，不過有少少上輕下重嘅感覺，加番對耳環同埋戒指點綴吓，換條粗縛帶會更加靚。」
何超蓮
「件褸好靚，可以話係Perfect，佢都Carry得好靚，無論化妝、髮型都好Match，可惜對Leggings、手套、鞋都有啲格格不入，換對Ankle boots或Platform密頭高踭鞋或涼鞋會靚好多。」
薛凱琪
「佢身形高瘦，就算着白色都唔覺得肥，對Nude色嘅涼鞋同件褸好襯，小披肩令個造型無咁悶，感覺新鮮啲同Cute啲。」
陳慧琳
「佢高挑嘅身形好適合着Trench Coat，不過Cutting好貼身，加上反光令面，易顯得人肥，不過佢着得好靚好修身。對高踭鞋嘅顏色好Sharp，同件褸嘅顏色撞得好靚，成個Look好Trendy。」
台灣名媛 孫芸芸
「時尚名媛Look，幾靚，啲顏色襯得幾好，寶藍色撞金色好Sharp，高貴得嚟又Fashionable，亦帶點Sexy感覺。」
Profile
香港著名模特兒陳嘉容（Eunis），曾為各大國際品牌行時裝騷，在時裝界打滾多年，無論是時裝的理論還是實戰都難不倒她，近年更為電視時裝節目擔任主持，化身stylist教人配襯衣着打扮。