阿B60啜不停 明年婚期范姜揸旗
「阿B」鍾鎮濤昨晚在深灣遊艇會補搞生日派對，以60年代嬉皮士為主題慶祝其60大壽，大批圈中好友大都悉心打扮，笠假髮戴頭巾為B哥哥慶生。壽星公生日願望是保持心境開朗，更稱想趁有氣有力時帶小朋友周圍去，今年流年唔夾，應該不會與范姜舉行婚禮。
「壽星公」B哥哥於傍晚時分與女友范姜，女兒鍾懿、鍾幗及跟前妻章小蕙所生的女兒鍾嘉晴，齊齊到深灣遊艇會開派對，為BB哥哥補搞60大壽。身為主人家的B哥哥以喱士「關刀領」恤衫配喇叭褲，再加上一頭及肩假髮和頭巾示人，范姜和女兒亦同樣以頭巾和「一件頭」長衫加涼鞋亮相。
設最佳衣着獎
B哥哥透露今次筵開15席大宴親朋，派對以60年代嬉皮士為主題，設有最佳衣着獎，打扮得最突出的勝出者會得3萬元獎金，負責評審的B哥笑言希望女兒鍾懿獲獎。B哥又稱原本打算在上月23日正日舉行的生日派對，但因好友阿倫有工作在身，故改期昨晚舉行。
昂然踏入花甲之年的B哥哥坦言願望是保持心境開朗，多和朋友聚會：「趁自己仲有牙、有頭髮同有力氣玩，可以上山落水，就同小朋友周圍去，增加佢哋見聞。」由於舉行了生日派對，所以他表明跟女友范姜的婚禮今年內暫不成事：「今年流年唔夾，不過唔使急，老婆（范姜）愈老愈可愛，今年搞住呢個先，最快都要第二年。」范姜亦稱：「我唔心急，其實都係睇我決定！」B哥哥即笑說：「佢先係最高決策人！」期間女兒鍾幗與B哥哥數度親吻，場面溫馨。
志偉KO壽星公
而一眾嘉賓打扮得相當貼題，劉嘉玲、邱淑貞（豆斗）、張學友、譚詠麟、曾志偉、陳百祥等紛紛悉心打扮到賀。身穿碎花短裙配長靴的嘉玲，和穿上喇叭褲涼鞋的豆斗都不約而同戴頭巾和帽。而黐假鬚戴假髮及頭巾的志偉十足「搞笑版魔盜王」，他說：「條褲最難搵，因為冇咁短嘅喇叭褲。」志偉又稱要做主持，故在派對早段保留實力：「之後我就會KO佢。」同樣戴頭巾到賀的阿倫表示特地從家中衣櫃找回60年代服裝，提到志偉揚言要「隊冧」B哥哥，阿倫笑言：「阿B好錫身唔會咁易醉，反而志偉就不自量力兼年事已高。」他又稱溫拿其他成員未能到賀，幸而早前已跟B哥哥食飯慶祝。
文：音樂組