熊黛林講「苟」經 風騷偷笑
熊黛林（Lynn）早前發雌威，高調保護和天王男友郭富城的戀情，成功打壓「情敵」苟芸慧後，日前Lynn風騷帶「狗」到寵物店與店員吹水，講得興起更展露笑顏。至於苟芸慧亦唔認輸，昨日公開多謝城城帶挈，令她工作接踵而至，豬籠入水。
自從郭富城與苟芸慧因合作而傳緋聞，「天王嫂」熊黛林相當着緊，除了兩度入場睇城城演唱會，以行動宣示主權，更公開發表「大婆論」確保自己地位不變，Lynn趕「苟」意圖明顯，力保正印地位。日前晚上約十時，Lynn風騷地揸車帶「狗」出巡，她還連走兩間寵物店，買足物資慰勞愛犬。
連走兩間寵物店
當晚Lynn堅持戴上黑超，以一身便服現身，只見她先往大坑一間寵物店，坐在店內和職員傾了一會，繼而再駕車往渣華道另一間寵物店購物，似是熟客的她和女店員傾不停，店員更熱情地幫她將貨品搬入車尾箱，之後隨即和Lynn企在路邊逗車內的狗仔玩，Lynn傾到笑笑口，買齊用品後她即揸車帶同愛犬回嘉亨灣寓所。
苟姑娘多謝城城
至於早前與城城傳緋聞的苟芸慧，昨日則以一身低胸吊帶打扮出席公開活動，再展其圓潤身形，其間被問到此活動是在和城城傳緋聞前或後接洽，她大方地說：「係之前接嘅，（緋聞有助事業？）唔多唔少有幫助，真係要多謝佢。」
苟姑娘透露拍完手上的劇集原本有意回加拿大，但因為時間太短，故改去泰國旅行小休，問到會否約另一緋聞男友高鈞賢同行？她說：「佢唔得閒，我鍾意自己一個人去旅行。」更說就算要找伴都會搵女仔，以免再傳緋聞。
文、攝：追蹤組