周子駒「煮」意多多氹掂媽咪
中日混血主持周子駒（Cyrus）唔怕肉麻，自言最愛他的家，自爆用勁多貼心絕招冧媽咪，最敬愛的人是已過身的嫲嫲，不過講到最心愛的「牠」，莫過於最淘氣的史納莎！
雖然Cyrus散發一身剛陽男人味，不過原來他為人極度心思細「蜜」，他自爆曾用無數sweet爆招數氹媽咪：「我平時會親自下廚煮嘢畀媽咪食o架！最初都驚佢唔鍾意，不過後來佢愈嚟愈enjoy，仲會開埋紅酒飲添！如果我唔使返工嘅日子，又會一齊行山。」
Cyrus又提到母親儲晒他由細到大送的手作卡：「原來自己以前會畫漫畫公仔畀佢，到佢四十歲生日時，我仲用毛筆寫咗『女人四十』四個大字送畀佢，都真係幾搞笑！」提到一身冧人「好功夫」師承之處，Cyrus透露自己似足已過身的嫲嫲：「其實自己都幾似佢，嫲嫲係一個識好多嘢嘅人，無論鍾意打扮、學煮餸定學外語都好，佢對我好大影響，喺佢身上學識無私同母愛。」他又直言唔怕激嬲爸爸媽媽，視嫲嫲為最崇拜和敬愛的人。
錫爆狗仔
除了愛家，Cyrus亦是愛犬之人，他錫爆屋企的史納莎Harry，他說：「由細到大都有養狗，本來有一隻北京狗，不過佢已經過咗身，雖然講起個心都離一離，不過依家有Harry陪我已經好滿足o架！佢好得人鍾意，有次寵物馬拉松，超多人問可唔可以同佢影相，佢又好好動！每次行完山之後再跑5公里都無問題，仲掂過我呀！」