世榮拒三子同台：Beyond已解散

葉世榮昨日為好友周啟生拍MV，世榮指半年前接到對方邀請即一口答應，今次將留港個多星期。問到Beyond另外兩位成員可有份獲邀請？他說：「好多時我做咩，大家都關心另外兩個會唔會一齊，但Beyond已經解散咗，唔係每樣工作都有其餘成員加入。（唔想再一齊？）已經解散，重組唔係簡單嘅問題，有啲人話告別，之後又重組又告別，冇乜意思。」世榮謂如果將來有感覺或有需要一起才會重組：「不過好難講，重組需要磨合期，如果再重組都係玩番以前嘅嘢，但時間會消耗咗，我年紀唔細，希望生命最後一個三十年集中精神完成自己夢想，呢個係我意願。」

想專注自己事業

今年為黃家駒逝世二十周年，適逢Beyond出道三十周年，不少網友都希望三子能舉行紀念演唱會，提到黃家強及黃貫中（Paul）都謂想舉行？世榮直言支持：「佢哋可以開o架，但我想放時間喺自己事業上，我遲啲都會發表隻歌送畀家駒，紀念形式、方法係隨大家意願，大家去搞我唔反對！前年家強都有問我有冇興趣，我都係解釋番我年紀唔細。（會唔會出席開騷以外嘅紀念活動？）睇吓係咩活動，如果有兩、三個成員一齊，就係重組嘅感覺，我盡量避免呢個感覺，如果我哋三個一齊，媒體就會炒作我哋重組，全世界以為我哋重組又問點解唔開演唱會又鬧我哋。」他並堅決表示三人不會同台，因不想大家誤以為他們重組。

開個唱紀念家駒

問到是否避見他們？他說：「唔係，但以前有不愉快經驗，令人好錯覺，之後我要花時間去糾正錯誤，我唔想，千言萬語在心中，我哋喺埋一齊唔一定畀大家見到，私底下隨時冇問題，公開場合就唔會。」他指七月將舉行個唱，其中有一部分會紀念家駒。同場的周啟生就言已邀請胡楓任個唱嘉賓，而新碟就分別與甄妮及世榮等合唱。

文：音樂組