50歲湯告魯斯 拖女回春
半百歲的荷里活首席男星湯告魯斯（Tom Cruise）近日傳出有新戀情，外貌明顯回春。大前日，靚佬湯現身阿根廷首都布宜諾斯艾利斯，與緋聞女友Olga Kurylenko宣傳新片時，臉上幾乎零皺紋！相反，年紀比他細16年的34歲前妻姬蒂賀姆絲（Katie Holmes）卻有衰老的迹象！
年屆50歲的靚佬湯，離婚後最近被傳力追33歲女拍檔「前邦女郎」Olga Kurylenko，二人於新片《攻‧元2077》（Oblivion）假戲情真，攞正牌談情！大前日，容光煥發的靚佬湯現身布宜諾斯艾利斯的酒店外面，穿上簡單的格仔恤衫，並手執太陽眼鏡及皮褸，即被傳媒大讚他有型有款，春風滿面的靚佬湯接受傳媒訪問時，又與fans握手及合照，有求必應，其實靚佬湯一向保養得宜，十年如一日。相反，其34歲前妻姬蒂卻老態畢現，成頭白髮。
靚佬湯趁有空閒便外出幫襯當地的餐廳，獲日裔主廚大讚為人友善及有禮，更疑似緋聞女友Olga等陪伴左右。
左擁右抱出席首映
而前日，靚佬湯則攜同Olga參觀當地的舊劇院，同晚二人與片中另一女星Andrea Riseborough齊齊出席《攻》片的全球首映禮，左擁右抱的靚佬湯盡享齊人之福。
《攻》片的首條製作花絮片段曝光，靚佬湯與Olga坐在模擬的泡泡船倒轉，嚇到大嗌的Olga要在旁的靚佬湯「呵番」。此外，靚佬湯日前在「俄羅斯版facebook」VK開戶口，成為首個在VK開戶的名人。
文：外娛組