朱璇師姐捉賊扭傷腰
前華姐冠軍朱璇在新劇中拍捉賊戲，未料戲如人生真的整傷尾龍骨，講廣東話對白更是困難重重，她在後期為角色再配音，被同劇演員高鈞賢笑她配音與否也差不多，令她哭笑不得，為了講正對白，朱璇請得三位軍師教路！
過往朱璇在劇集中多次扮演花瓶角色，至最近終有新嘗試，在《女警愛作戰》劇中飾演強悍女警，未料一改戲路，她即負上沉重代價，因劇中講述她追賊整傷尾龍骨，誰不知「戲如人生」真的受傷了，她說：「有一日拍外景，講我捉賊時整親條尾龍骨，點知現實中就真係整親嗰度，嗰日只係好勉強咁拍完戲份，第二日仲完全郁唔到！」認真慘情。
配音畀人笑
由於朱璇的廣東語有欠純正，唸廣東話對白分外困難：「有場戲要我鬧翟威廉，對我嚟講鬧人已經好難，導演教我切開嚟講，後來導演畀我為自己嘅對白再配音。其實佢可以搵第二個幫我配，好感激佢冇放棄我！」傻氣的朱璇以為配音的對白應比現場講得要好，誰不知估計錯誤，她說：「有次配完音撞到高鈞賢，佢不經意問我：『點解你要配音嘅？其實都差唔多一模一樣。』」令她不知好嬲定好笑。
變得有信心
雖然朱璇在演戲上渡過重重難關，幸好她也為自己做好「三手」準備，特意請了三位老師教她廣東話：「其中一個係我自己搵嘅，平時有劇本就搵佢讀，第二個老師係前輩蔣志光，佢用自己嘅方法教我發音，第三個係珍姐（曾勵珍），佢都會教我讀劇本同咬字，因為有好多字我都唔知正確發音，有佢哋三個，我就變得有信心！」
文：文珊
攝影：秦健輝
場地：又一城
服裝：bread n butter