馬浚偉懶理舊仇力撐恩師

馬浚偉之前與無綫藝員部合作不磨合而要求提前解約，但據知無綫戲劇製作總監曾勵珍一直邀他返娘家拍劇，但馬浚偉之前趕拍內地劇關係，推掉了兩個檔期，不過監製梁材遠坦言已落實找馬浚偉5月返無綫開拍30集的《守業者》，更透露：「原本係時裝劇，馬浚偉會同Bobby（歐陽震華）飾演兩兄弟，但Bobby之前急性肺炎，又未拍完《情逆三世緣》，都要休息就推咗。依家重寫劇本，改為民初劇，由麥長青頂上，女主角係楊怡，仲會喺佛山、清遠取景。（馬浚偉合約搞掂未？）得o架嘞！預晒佢，佢要試造型，我哋亦已安排晒同佢度身，造過晒啲衫。」

再遇樂易玲不尷尬

記者昨致電馬浚偉時，他聞言謂：「吓！等我哋啲合約搞埋先啦！（係咪珍姐出馬幫你傾合約？）係！由我前年離開公司，佢一直想我返去拍劇，珍姐係我師傅，合約佢幫我處理。」問他可說是跟藝員部不歡而散，問他有否跟藝員部高層樂易玲溝通？他坦言：「唔好講不歡而散，大家都係成年人，（遇到樂小姐會唔會尷尬？）冇嘢啦！我只係演員，以前我簽經理人合約，依家唔係，其他嘢我唔理。」

Bobby坦言原本未接《情》劇已接下此劇，但沒料會發生意外，他笑言：「我8號都要出發拍外景，如果接埋呢套就要緊接！其實我都復原o架喇，但想抖番幾個月，材叔都好體諒，珍姐話健康最緊要！」

文：影視組