羅力威廣州簽唱high過粉絲
歌手羅力威日前到廣州舉行大型簽唱會，與內地歌迷作近距離接觸，近百威迷一朝早就前往現場霸頭位，各人都手持不同款式的閃光燈牌，現場相當墟冚！
羅力威甫出場就引起粉絲的尖叫，他先打過手印，再揮手笑說：「一年內出咗兩張專輯，但好少時間喺內地做宣傳，今次終於可以嚟見大家，本身都好擔心大家唔認識我，好開心見到現場反應唔錯！」他又笑言自己心情比粉絲更興奮，識做的他亦即場獻唱首本名曲冧粉絲，暈得一陣陣的粉絲又跟着合唱。
盼盡快儲歌100首
臨近尾聲，意猶未盡的粉絲與羅力威一同合照，在簽名環節，有求必應的羅力威耐心地簽足3個鐘先走。其後，他又表示：「好開心可以同粉絲玩遊戲，仲有啲香港嘅朋友特登嚟睇我，好感動。」羅力威表示希望能夠再次回到廣州與歌迷聚會，他又不忘宣傳即將舉行的音樂會，他說：「工作太忙，好少見內地嘅歌迷，做完音樂會後會籌備第三隻唱片，希望快啲達到100首作品啦！」
文：音樂組