張兆輝連踩16粒鐘躁爆瘡

張兆輝與謝天華前晚為《神槍狙擊2013》於室內war game場拍攝決一死戰結局戲，天華未埋位已見雙眼滿布紅筋，輝哥則下巴爆瘡。原來二人為趕煞科埋尾，由下午三時開始廠景疊外景直踩到翌日早上七時，連拍16粒鐘。岑麗香及陳志健等飛虎隊成員則在二人決戰後才加入救援，眾人拍攝完畢後齊齊合照，輝哥還在微博留言說：「拍戲這辛苦的行業大家捱得住是因為有夢想，咁多位兄弟姊妹，大家記住只要有夢想，夢想可成真！」而前晚有劇組人員見輝哥接受採訪，一度煞有介事欲驅趕本報記者。

再拍睇檔期

問輝哥會否因今次太過辛若不再拍劇，他說：「劇一定會繼續拍，但未必會喺香港！（TVB劇呢？）咁就要睇吓檔期喇，其實一向都知喺TVB拍劇辛苦，但依家年紀大咗，體力冇以前咁好，試過連拍文戲都因為太累，唔知自己講緊咩對白。」輝哥近幾月未能好好倍伴老婆及一對仔女，他期望在復活節假期共享天倫樂。對周刊指他罵無綫冇人性一事，張兆輝昨日透過電話稱從冇接受該周刊訪問：「如有不滿會我直接同公司反映，況且天華都冇冧廠，咁樣講對TVB都好唔公平。」

文：影視組