城城露點傳情 Lynn勝券在握
熊黛林（Lynn）前晚再度殺入紅館支持男友郭富城，城城趁「肌」藉着「兩點」說愛你，對着女友自揭小背心晒肌傳情，更在萬人見證下握「熊掌」。被冧得暈陀陀的他在跳彈床上失手「撻生魚」，認真一額汗！
郭富城前晚舉行第八場《郭富城舞臨盛宴世界巡迴演唱會2013香港站安哥篇》，城城與苟芸慧爆出緋聞後，熊黛林為確保「城嫂」地位，早已在第二場個唱時高調入場趕「苟」。豈料，苟姑娘日前竟踩場坐嘉賓靚位撐城城，待遇更比「正印」Lynn好。被剃眼眉的Lynn日前出席活動時，暗寸「情敵」苟姑娘勿惹爛桃花，並預告誓要坐握手位。果然，不甘被「搶城」的Lynn前晚拖媽媽及經理人，帶隊第二次攻「城」宣示主權，更一雪前恥坐鎮正台第三行握手位。
練得一身好Body的城城在台上自嘲是排骨仔，實情想借「肌」向女友示愛：「我依家冇乜肌肉，得番副排骨。」說罷他即在女友面前拉高背心露兩點，期間有粉絲大叫：「除褲！」城城笑言：「咁鹹濕！」到握手環節，城城刻意走到Lynn面前，繼一年前在個唱上世紀握Lynn手後，前晚在萬人見證下再烏身與女友Sweet爆握手，旁邊的粉絲即投以妒忌眼光，並引起全場哄動，十足一場「富黛恩愛騷」。
失手撻生魚
似乎城城被女友電得失晒魂，在拿手的跳彈床環節，意外失手「撻生魚」墮床，期後幸無大礙繼續表演。在Lynn離開時，問到個唱好睇？她甜爆向城城派Like，更化身小粉絲說：「唔係世紀握手，我都係Fans嚟。（承認關係？）唔好意思，總知今晚好開心！」
文：音樂組