黃智賢人棄我取 食住上登基
黃智賢於去年台慶頒獎禮的角逐名單上竟冇份提名男配角，最近有份擔正做男主角，但他不覺是公司給他作「補償」，更指不可混為一談，他坦言多謝公司開綠燈，才有機會接拍。
黃智賢（Ben）剛拍罷《情逆三世緣》，現正埋首拍新劇《食為奴》，劇中，他由王子演到皇上，與萬綺雯更有感情線，而王祖藍飾演其死黨。繼多年前的《真命天使》、《美麗傳說》後，Ben今次再次擔演第一男主角，問他會否感到壓力？他坦言：「心情唔同咗，個人成熟咗，嚟到咪拍囉，同平時冇乜分別，只係通告密啲啦。」
獲公司開綠燈
而上年台慶頒獎禮中，Ben竟冇份角逐男配角，不少圈中人及觀眾都戥他不值，說到今次男主角是否公司給他的「補償」時，他說：「我唔覺囉！件事自己都放低咗，唔好拉埋兩件事嚟講，公司畀機會咪努力去做囉！唔好用『補償』呢啲字眼，好多事都係一個機緣，唔係林峯推咗唔做，我都唔會有機會，本來我四月要拍另一個劇，都係公司開綠燈，畀機會我先有得拍。」
拍楊怡擦火花
現時播映中的劇集《仁心解碼II》，他仍是演警員，今次與楊怡是同事之餘，二人亦有感情線，問他覺得楊怡怎樣，他笑言：「其實阿怡幾癲，幾好玩，個人好率直，佢飾演精神病者，我唔知佢真神經定假神經，只係覺得楊怡啲戲咁好嘅，大家要睇睇佢嘅成魔經過，變成連環殺手。」問他覺得哪一輯吸引些，Ben笑言：「 我覺得今輯比上輯更精彩，之後講楊怡殺人，我要調查番自己女友，有好多衝突、火花，而且今次故事圍繞警員同醫生，蕭正楠角色都好搶眼，除咗佢嘅哨牙造型外，都幾多笑位。」
場地：AN-TICO
文：影視組