陳宛蔚練糕招 冧錢國偉
「味之天使」陳宛蔚（Calinda）為了訓練自己將來可成為「入得廚房、出得廳堂」的賢妻良母，專程上堂學整甜品，似乎想順道為即將生日的男友錢國偉預先炮製生日蛋糕！
自小有家傭服侍的Calinda笑言自己出身自「地獄廚房」，她說：「我好鍾意學整甜品，平時亦都會學人煲吓湯，不過我真係好『姐手姐腳』，好記得有一次我仲燒毛巾！嗰次我諗住利用毛巾隔熱，再捧起個湯煲，點知就唔小心燒着條毛巾！仲有一次我學人整Pizza，本來已經當成功焗好咗個Pizza，當我喺焗爐拎個Pizza出嚟時，竟然唔小心將成個Pizza反轉跌落地下！」
約女賀男友牛一
而Calinda的男友錢國偉（Wilson）將於4月9日生日，問到會否為男友炮製生日蛋糕？她笑言：「都可以諗吓，不過我手勢真係一般，如果要整，依家要開始practise定！」
對於如何為男友慶祝生日？她甜蜜表示：「其實真係未知點慶祝，佢成日都要出埠公幹，好有可能生日都唔喺香港，如果有時間慶祝，我可能會叫晒成班『味之天使』去佢屋企食飯。（送咩生日禮物？）我以前成日都會畫油畫送畀朋友或家人做禮物。（送油畫畀Wilson做禮物？）都要睇我有無時間畫，哈哈！」
場地：天使烘焙材料專門店
攝影：吳文聰
採訪：Winnie