秋生惹是非：可能我好恰

《娛樂on Show》主持人Angela今集請來黃秋生及導演邱禮濤大爆電影合作的苦與樂。由國藝影視及英皇電影聯合出品的電影《葉問——終極一戰》即將上映，早前更入選烏甸尼斯遠東電影節競賽單元，主持人Angela問導演邱禮濤心情會否緊張，他坦言：「心情當然開心（有無壓力？）都拍咁多年電影啦，心情都係咁上下！」而在旁的黃秋生則表示平常心面對，更坦言要減定肥參加電影節，他說：「準備減肥去食意大利粉，嗰邊小鎮好靚！再加上請埋你去，嗰度啲嘢又好食，酒又好飲，有時間去埋羅馬shopping添！」

葉問上身

「葉問」一角由2008年已經有不少電影明星擔任過，主持人Angela問秋生在接拍時候有否猶豫過？他即搞爛gag說：「有呀，我不停係度諗，我拍電影都過百年啦！」Angela隨即轉戰問導演有否猶豫過，他說：「我就無猶豫，但有思考（思考啲咩？）思考我應該拍啲咩！」導演大爆秋生不但在鏡頭前甚有葉問味道，連在鏡頭後都繼續keep住這份味道！

黃秋生笑言要減肥出席電影節，希望可以順便去羅馬行街！

黃秋生即場搞gag，令主持人俞詠文笑個不停！

電影中不少武打場面，平時打開大聖劈卦轉到詠春的秋生，坦言甚有難度：「大聖劈卦要大開大合，詠春要很少很窄（出招唔出聲？）一啲啲門派啦！不過戲入面為咗要保持葉問有大師風範，所以都唔發聲。」

我行我素

去年黃秋生惹上不少是非，主持人Angela問秋生會否覺得是非衝自己而來？他笑言：「我不嬲都唔惹是非，一向都係是非惹我（點解？）可能我好恰！」

早前黃秋生因在微博發表「而我不知道羅志祥是誰」，而遭到對方粉絲圍插，問他會否想過放棄微博市場？他說：「無！我唔會為咗其他人而去改變！」想知道黃秋生對羅志祥事件更多看法？想知道導演邱禮濤拍電影的趣事？請即click入《娛樂on Show》睇啦！

文：專案組