譚耀文GYM保青春 搏殺養家
近年轉簽內地公司而工作不斷的譚耀文，因與老婆仔女在港生活，為團聚為工作，阿譚得要頻撲兩邊飛。不過年屆四十多的他仍保養得宜，皮光肉滑，最近阿譚更為護膚品牌擔任代言，日前在港拍廣告相時，更公布好消息於去年底在內地奪得第一屆全國微電影選舉之最佳男主角。
轉戰內地的譚耀文，成多產藝人，去年拍了四套劇集、三套電影，雖然工作繁忙，但劇組給他悉心安排，每月可飛返香港與老婆仔女團聚，令阿譚可平衡家庭和工作。亦因有平衡的生活，阿譚雖年屆四十多，仍保養得宜，最近他返港為護膚品牌擔任代言，並拍廣告相片，拍攝時見阿譚狀態不錯，原來他在忙碌工作中亦Keep住做GYM，難怪容光煥發。
出國語碟圓願
狀態得以保持，阿譚在工作上多方面發展亦得到好成績，他透露去年底在內地奪得第一屆全國微電影選舉之最佳男主角，阿譚稱：「彭浩翔做監製，大家合作過好夾，佢有個古仔搵我，拍咗呢套微電影用嚟參展，贏出最佳男主角我都好開心！」除了微電影、拍劇、電影外，阿譚還可圓多年心願推出唱片，他說：「好多年冇出唱片啦，今次會喺內地出國語碟，算係完成自己心願，始終我係唱歌出身！」
內地公司為阿譚作全面發展，無綫最近雖鬧演員荒，但阿譚亦未有返娘家助陣之心，他坦言珍姐（曾勵珍）有邀拍劇：「珍姐有傾我返去拍劇，但真係好對唔住，暫時都冇時間，（內地拍劇更好搵？）其實唔低o架（指價錢）！但我就梗係唔高，OK啦！傳媒畀面啫！我哋都付出好大代價嘅，呢個價錢係合理嘅！（香港觀眾見唔到你？）最近我同米雪合演嘅內地劇《鳳凰牡丹》都好好收視，邊度拍都一樣，觀眾一樣睇到我嘅！」
文：影視組