任達華自封空中最強單挑甄子丹
影帝任達華和宇宙最強甄子丹近日馬不停蹄拍攝電影《3D冰封俠》，在戲中二人有連場打鬥場面，但華哥指自己已為惡鬥練到手瓜起（月展），更自稱「空中最強」，完全唔怕唔夠打！今次最強對最強，必定有一番龍爭虎鬥！
任達華、甄子丹、莊思敏、雨僑、內地藝人黃聖依及王寶強等昨日在舊機場搭建而成的假青馬大橋，為電影《3D冰封俠》拍攝追逐戲，華哥會揸電影公司向張智霖友情借出的黑色「辣牛」林寶堅尼，不過宇宙最強的丹爺都唔輸蝕，一樣有白馬任騎。
預早買保險
在戲中，華哥和丹爺會有連場打鬥，而重頭戲更會出動三架直昇機，由飾演警察的華哥在空中追捕騎着白馬的丹爺。擁有宇宙最強稱號的丹爺並非浪得虛名，但華哥卻冇有怕，還搞笑謂：「因為要同子丹打，我依家練到有腹肌同手瓜起（月展）！（夠唔夠打？）有場我會喺直昇機上面，我係『空中最強』，可惜冇水底戲，如果唔係我就係『水中最強』！」
華哥又透露，在戲中經常有持槍場面，他笑言：「我諗全宇宙都覺得我揸槍最型！」即使自誇空中最強，但華哥指已為空中追捕戲買足保險。
籲政府支持
丹爺謂，其實早在大半年前已向政府申請在青馬大橋實境拍攝，但遲遲未獲批准，他呼籲政府多多支持電影拍攝，並說：「電影嘅推廣效果有時比旅遊宣傳片更好！」丹爺又指要盡快拍畢香港的戲份，趕及下月初到長白山拍攝雪景：「如果今年拍唔到（雪景）就要等下年！」
文：影視組