任達華甜蜜慶生琦琦甘受冷落

華哥前日（19日）58歲正日生日，晚上他與琦琦、愛女及外母齊齊享天倫樂吃晚餐，溫馨慶生。華哥和琦琦於晚上七時左右先拍拖行中環，之後兩人再到商場外接由司機車接載到來的女兒。當華哥一見到坐在車內的囡囡，即表現興奮並拍手掌氹囡囡，繼而抱囡囡下車，盡顯慈父本色；而小晴佳見到爹哋即如樹熊上身一樣，撲到爹哋懷中攬到實，氹得華哥甜入心。其後華哥全程拖實囡囡手仔步行到餐廳，兩父女如連體嬰般黐到實，琦琦則和母親尾隨兩人身後，似乎有點備受冷落。當華哥和琦琦見到記者，即友善地打招呼，再由琦琦先帶囡囡和母親入餐廳。

囡囡送卡甜到漏

被讚狀態fit爆的華哥笑言：「個女話我今年27歲，佢話『Dad you are 27!』今晚我哋食西餐，少油健康啲。（囡囡同太太送咩生日禮物畀你？）個女畫咗張卡畀我，佢尋晚半夜畀我嘅，畫滿晒公仔，好童真，好sweet，甜到我都瞓唔着。老婆就送咗個旅行畀我，遲啲我哋一家人會去歐洲玩幾日，relax吓，又可以順道睇埋場英超。真係好多謝老婆。（生日願望？）身體健康啦！」而琦琦對於華哥當晚全程黐實囡囡，似是把她冷落一旁，她稱完全不介意：「好好呀，佢哋父女咁好感情，咁sweet，其實佢平日忙拍戲都好少時間可以見到囡囡，所以一見面就黐住好正常，想陪個女多啲。」

老公與女兒感情要好，琦琦大讚sweet。

華哥抱小晴佳下車，女兒即化身樹熊攬實爹哋。

對父親充滿崇拜

華哥拖實女兒，琦琦與母親則尾隨其後。

華哥與女兒邊行邊互攬，十分溫馨。

琦琦前日早上已先在微博祝賀老公生日快樂，她寫着「Happy birthday to you..my love」放上一張生日蛋糕相，照片中蛋糕三層高，還有氣球，甚有派對氣氛，另外，又放了小晴佳畫給華哥的生日卡，小晴佳的畫表露了對父親的崇拜，並寫着：「Best Daddy Ever」及「Bring more trophies」為華哥打氣，希望華哥在電影方面贏得更多獎項。

文：名人組　

攝：追蹤組