楊焉暗寸JJ顧住拍拖
藝人楊焉（Carol）加盟陳百祥旗下即是非一籮籮，有指她上位踢走「一姐」賈曉晨，昨日楊焉又暗寸JJ戀愛大過天，自言會工作至上，愛情第二，又賣口乖表示拍拖都會問過老闆。
「浸大E神」Carol新加盟陳百祥（阿叻）旗下即備受重用，先伴阿叻到澳洲拍旅遊節目，更以三點式泳裝上陣，拋胸搶收視。反而本是一姐的賈曉晨（JJ）就戀愛大過天，有傳Carol上位踢走JJ！
呂慧儀大露背行善
Carol昨日封胸出席慈善活動記招，她直言不介意賣性感協助籌款，問到是否要取代JJ地位？她謙虛表示：「點會呢，每個人都有自己嘅位置，只係工作需要先性感示人。」
她又替阿叻澄清，指對方不會偏心，不過Carol疑暗寸蜜運中的JJ：「叻哥個個都錫，我先廿幾歲，我會揀工作多於愛情，就算有意中人都會問吓叻哥意見。（夾埋同公司蔚雨芯踢走JJ？）我哋好善良o架，冇攻擊性！」而同場的呂慧儀就大露背上陣，並笑言如有善長仁翁出好價，會為慈善捐出身體。
另一邊廂，JJ出席其他活動時，大騷三吋事業線上陣，提到Carol加盟頂替其位置？她說：「唔可以咁講，冇話邊個頂邊個，個個路線唔同，做得好就得，觀眾係裁判，唔係自己講。（有冇睇佢喺節目拋胸？）兩個字，好正！有睇少少，好正，好勁！呢樣係好多宅男嘅福利，見到都戥佢哋開心。」
月底約滿未諗去向
而JJ本月底便約滿，問到去向如何？她說：「好多公司搵我，但唔想完約就即刻簽另一間。（唔同阿叻續約？）唔一定，我哋係信任關係。」與公司合作9年的JJ坦言不怕失寵，但都想轉換環境，至於會否與男友樊少皇簽同一公司？她說：「呢段時間會多啲探佢，唔一定要同公司。」她揚言現時工作為重，故一早已向男友明示不要求婚：「睇時機，啱就會提示。」文：音樂組