陳慧琳無心戀戰 頒獎禮
兩子之母的天后陳慧琳（Kelly）近日再戰樂壇推出新碟，依然勁歌熱舞晒腿會歌迷，不過，對於音樂頒獎禮，Kelly經已無心戀戰，寧願將時間用來睇電視湊仔。
Kelly相隔四年終推出廣東新專輯，早前舉行MOOV LIVE會歌迷，穿上黑色晒單腿的性感造型演繹新碟歌曲。對於再戰樂壇頒獎禮？Kelly坦言：「冇諗過，歌掂先再算，咁難得抽起身，又踩番入去，唔好搞咁多嘢，我要湊仔，睇電視支持就得嘞。」
50歲開騷
講到何時再踏上紅館開個唱？Kelly稱月底會演出哥哥張國榮逝世10周年音樂會，而6月亦會參與雷頌德的音樂會演出，至於個人演唱會，Kelly待完成國語專輯才想，笑言：「或者等到我50歲先開，到時咪唔使跳舞囉。」問到大仔劉昇（蝦餃仔）可有看過她的演唱會DVD？Kelly笑謂：「冇喎，唔好意思好似逼佢睇咁，好尷尬做唔出，頂多我喺屋企練歌時佢聽到囉。」
撐樂霏戀
雖然Kelly現已全身投入工作，但對於兩個愛兒的照顧都不會放軟手腳，她坦言：「唔放得手o架，咁辛苦建立佢哋嘅生活模式唔亂得，冇王管點得o架，交畀佢老竇搞都係得個亂字。」提到同公司的吳雨霏（Kary）與余文樂爆出「樂霏戀」，對唱片公司阻Kary認戀情點睇？Kelly抵死說：「點解呀，咁靚仔怕乜啫，應該好自豪添啦。」
文：音樂組