Yumiko吵大鑊 婚前面左左
歌手鄭希怡（Yumiko）與拍拖8年的化妝師男友Andy，將於年底11月拉埋天窗，為婚事張羅的她緊張得情緒起伏不定，日前兩人於跑馬地撐枱腳時，卻因婚事鬧意見而面左左，Yumiko改天即call齊姊妹團飲酒訴苦，更承認最近為婚事極為忟憎，與Andy不時嘈交。
31歲的歌手鄭希怡（Yumiko）與化妝師男友Andy（梁學儲）相戀8年以來感情穩定，去年6月她於布吉受傷後一度昏迷，男友貼身照顧，成功贏得Yumiko芳心，答允做梁太。Yumiko曾透露原定上月舉行婚禮，順便慶祝兩人拍拖8周年，奈何最終趕不及，婚期延至今年11月。
Yumiko連月來為婚事張羅，除四出挑選婚紗及晚裝，更計劃於上海老家擺酒後，再在香港設宴卅多圍招呼圈中好友。日前晚上7時許，Yumiko與Andy拍拖外出撐枱腳，Andy驅車接載未來老婆到達跑馬地後，一身便服打扮的二人下車後步入附近的食店醫肚，綁上頭巾的Yumiko甫坐下已點了滿枱美食，兩人邊吃邊傾，似乎商量婚禮事宜，但其後卻見Yumiko面燶燶，看來與未婚夫意見不合，未幾更匆匆埋單離開。
狼狽上車扁嘴
兩人步出食店後便步往取車，但二人沿途面左左，只見Yumiko以手臂夾着物件外又拿着手袋，她向Andy連環炮轟後便只顧傾電話，在旁的Andy見她一袋二袋亦懶理，未有上前幫手，還先行上車，令苦無空手開車門的她頗為狼狽，見未婚夫仍「袖手旁觀」，Yumiko惟有嘴扁扁上車。
事隔數天，Yumiko相約姊妹團成員黃伊汶等人，於晚上7時許在灣仔的餐廳聚會，眾人邊傾邊飲，期間Yumiko苦口苦面似正訴苦，經友人安慰一輪，她才展露笑容，心情好轉後，她一度走出店外講電話，似向Andy報到，最終逗留兩個多小時便與眾女友分別返歸。
「最近我好忟憎」
Yumiko昨日在電話中被問及與Andy街頭吵大鑊一事，她承認兩人最近經常有吵架：「我哋係有嗌交，最近我好忟憎，其實我哋之前好少嘈交嘅，呢排有啲嘢，（為咩事嘈？）都係酒席啦，本來諗住搞掂香港卅幾圍嘅酒席，就可以專心搞上海酒席，點知依家兩面都未得。（點解揀咁耐？）因為香港方面，一直都想揀戶外場地，但又驚到時落雨，所以選擇唔多。」問Andy有否幫手籌備婚事？她說：「佢好忙，冇咩時間，依家唯一做咗嘅，就係編好晒朋友嘅座位。」
文、攝：追蹤組