星級老師許佩病逝
歌唱老師許佩前晚因病逝世，據知已年屆九十的她死因是心臟衰竭，不少前輩級藝人如謝賢、劉松仁及關菊英均是許佩門生。謝賢表示一定會出席老師喪禮，並慨嘆：「就嚟我都跟住去喇！」
許佩老師曾是無綫藝員訓練班的導師，不少圈中人曾跟她學唱歌，地位尊崇及備受學生尊敬。據知她前晚因心臟衰竭逝世，徒弟劉松仁、關菊英、謝賢等均感傷心及不捨。雖然許佩老師一直居於加拿大多年，但關菊英、劉松仁等都不時與她相聚。
劉松仁昨日於微博留言，指前日心血來潮去醫院探許佩老師，怕再也見不到她，怎料就收到消息指老師前晚走了，更嘆謂要對身邊所有一切要好好珍惜。
劉松仁：好突然
記者昨日致電身在天津的劉松仁，他坦言前日才探過老師：「尋日（前日）探佢都仲幾好，精神唔錯，點知我接到米雪嘅消息話佢過咗身，聽講係心臟衰竭。好耐之前登台時我已經跟佢學唱歌，同佢不嬲都有聯絡同見面，當佢好似阿媽咁，仲諗住睇吓幾時可以再出嚟打吓麻雀。真係好突然，所以老人家想見就要見。」他又指許佩的女兒會由美國返港，處理其母身後事。關菊英亦稱之前有探過老師，不過近日自己很忙，故個多星期沒有聯絡過：「佢都90歲，之前佢生日，大家知佢唔係咁舒服，只係去佢屋企探佢，我都覺得好唔開心、好突然。」
謝賢一定去鞠躬
而謝賢自言是許佩的最後一個門生，他昨日接受電話訪問時謂：「依家睇吓幾時出殯，一定要去鞠躬。佢之前返嚟我又唔喺香港，聽聞幾個月前本來有個生日會，但唔知點解冇搞到。不過佢都年紀大，屬於笑喪，就嚟我都跟住去嘞！不過都仲有十幾年。」至於跟許佩學師多年的米雪稱：「佢好似家長一樣，會成日提我哋唔好咁忙，見我哋咳都會好關心，我哋有時會搵人幫手寫譜，老師都會錫住我哋荷包。」
文：影視組