佘詩曼轉口味甜笑電TB

37歲佘詩曼自從三年多前與鄭嘉穎甩拖後，感情生活一直未有着落，雖然早前被拍到與奀星麥子樂一杯雪糕兩份食，懷疑譜出姊弟戀，不過事後阿佘表示兩人只是同一個契媽，由細識到大，關係如家人一樣。向來多戀事的阿佘持續dry爆，前日被發現轉黐男性化打扮的短髮女友人，口味大改變。

當日下午5時多，身穿鮮紅上衣，頭戴型格紳士帽的阿佘，聯同短髮女友人於中環歎茶，兩人相對而坐，身邊另有一名女友人，雖然三人同枱，但阿佘全程和短髮女友人相當好傾，兩人雞啄唔斷，將女友人冷落在旁，期間阿佘一邊用手送食物入嘴，一邊甜笑放電，風騷本色再現。

見記者極速彈開

傾足個多小時，三人離開餐廳結伴行時裝店，只見短髮女友人全程陪伴在側，不時和阿佘密密斟，連行多間店舖後，雖然阿佘未有收穫，但一樣笑到見牙唔見眼，未幾兩人發現記者拍照，見慣大場面的阿佘淡定地任影，但身邊的短髮女友人明顯有點避忌，極速地彈開一個身位，繼而雙手插袋，頭耷耷地繼續行。

文、攝：追蹤組