杜汶澤玩謝經理人直射Mani
杜汶澤於新片扮演經理人尖酸涼薄入形入格，昨日繼續發揮寸嘴本色，先後揶揄鄭希怡似人妖，又暗諷蔡卓妍身材似紙板，最後更稱其經理人角色非影射霍汶希（Mani），而是直射對方！事後他賴皮笑言：「唔玩邊有得笑！」
杜汶澤、蔡卓妍（阿Sa）及鄭希怡（Yumiko）主演的英皇電影《超級經理人》昨舉行記者會，精華片段率先曝光。阿澤於戲中將經理人的涼薄演得入形入格，他在台上先揶揄Yumiko：「你係全港第一個變性經理人，我見你同人妖合照好開心。」玩遊戲張貼經理人的特質語句時，他又指着印有阿Sa的紙板說：「貼喺邊？阿Sa係紙板？做乜將Mani啲嘢寫晒出嚟？佢都想犧牲色相，不過冇人要。」更懶皮說：「唔玩邊有得笑！」之後他再辣埋古天樂：「我戲入面被好多女仔摸，以為古天樂咁靚仔先有，點知佢依家拍親都係麻甩佬戲，邊有我咁好艷福！」
一啖雞屎一啖糖
事後阿澤在Mani陪同下受訪，Mani企圖為他解圍，豈料阿澤續說：「依家你做訪問定我呀？」Mani即謂：「我驚人哋誤會你啫。」阿澤才認真地說：「今次做呢個角色，我唔影射Mani，係直射佢，你估做經理人做得咁成功易呀？（踩完又讚？）我係一啖雞屎一啖糖囉。」
阿澤開設製作公司，有指會力捧阿Sa，他謂：「唔好咁講，我靠佢搵食！想將舞台劇《29+1》拍成電影版畀佢發揮。最好今年拍明年先上，睇完《一代宗師》，相信嚟緊影帝影后都非梁朝偉同章子怡莫屬。」
阿Sa怕代言內衣
Mani承諾會力捧阿Sa於影壇發展，問阿Sa是否落力爭獎？Mani即答：「一定要攞到！」令阿Sa靦腆說：「攞終身成就得唔得？」Mani又指有內衣品牌曾找阿Sa代言，阿Sa說：「小童內衣呀？咪嚇親人啦！」
另外，阿澤昨日在Facebook留言：「最近有很多人說我像以前一樣、很寸、得罪很多人……我只記得，前幾年沒人找我拍戲，日日在家中，那時候便沒有是非，做人真難……」
文：影視組