香香新劇道具屋離奇失火
謝天華、張兆輝及岑麗香昨日到屯門龍門路一處山頭，拍攝無綫新劇《神槍狙擊2013》，對於拍攝場地一間道具屋日前離奇被焚，現場留下一片焦土，天華說：「聽講係附近啲頑童百厭多手，可能見間屋之前拍火燒，索性一把火燒晒佢。（劇組怕報警會阻拍攝進度？）冇人命傷亡，又冇乜財物損失，報警都唔知報乜，不過呢個都唔係重點，間屋我哋拍完火燒，劇組噴水淋濕晒成間屋，應該冇咁易起火，呢單嘢夠晒離奇。」
張兆輝不信陀地報復
日前拍攝時遭反應彈碎片擦傷右耳的張兆輝，對燒屋亦有所聞，他說：「唔知係咪有人貪玩啦，估計就唔係簡單意外，好彩冇燒埋周圍啲樹，唔係又入埋我哋數咪弊？（收陀地不遂遭報復？）唔會啩！呢度政府地嚟喎，我哋要鎖匙先入得嚟。（有傳唔報警費事阻拍攝？）唔關我事啦，公司叫點做，我就點做，有時間我都理咗自己隻傷耳，去睇吓醫生先啦！」
岑麗香則說：「我都唔知發生乜事，（有冇見過有人收保護費？）冇留意，次次都係工作人員安排好，我哋去現場就得，（擔心安全？）希望係意外，做嘢啫，唔好諗得咁複雜，自己都舒服、好過啲。」對於有傳香香進軍大銀幕，苟芸慧決定性感搏搶灘，香香說：「我哋係好姊妹，希望大家都有好發展，我都未知有冇期，亦未知使唔使性感，最好唔使，我形象係開心，唔係性感呀！」
文：影視組
攝：樊愛慈